Арсенал експресно го врати првото место во Премиер лигата откако славеше со минимални 0-1 на гостувањето кај Евертон. Само неколку часа откако Манчестер Сити привремено го презеде врвот, избраниците на Микел Артета покажаа шампионски нерви и со минимална победа ги освоија трите бода на „Хил Дикинсон“.
Моментот на лудило на О’Брајан и ладнокрвниот Ѓокереш
Клучниот момент на натпреварот се случи во 27. минута. По еден корнер на Деклан Рајс, дефанзивецот на Евертон, Џејк О’Брајан, несфатливо играше со рака во сопствениот шеснаесеттник. По ВАР прегледот, судијата покажа на белата точка, а Виктор Ѓокереш со „бомба“ го совлада Пикфорд за својот прв гол по пет натпревари.
Статистиката вели дека Швеѓанецот е непогрешлив од пенал – ова беше негов 19-ти последователен реализиран удар од белата точка во лигашки фудбал, серија која датира уште од неговите денови во Спортинг.
Стативи и нервоза во вториот дел
Арсенал можеше многу порано да го реши натпреварот. Леандро Тросар и Мартин Зубименди ја погодија рамката од голот, додека ударот на Букајо Сака беше избиен од самата гол-линија. Евертон, иако ослабен без повредениот Дјузбери-Хол и Ндиаје (кој е на Африканскиот куп), се обиде да притисне во финишот.
Домаќините беа гневни на судијата Барот кога Вилијам Салиба го собори Тиерно Бари во казнениот простор, но судијата и ВАР проценија дека нема елементи за најстрога казна. На крајот, најдобрата одбрана во лигата си ја заврши работата и го сочува водството за 13-та победа во сезоната.
Со овој триумф, Арсенал сега има два бода предност пред Сити и шест пред Астон Вила, потврдувајќи дека оваа сезона е подготвен да оди до самиот крај во трката за титулата.
