Наполи пропушти шанса да освои планирани бодови на домашен терен против Верона (2-2), но со оглед на тоа што губеше со 0-2, избраниците на Антонио Конте можат да бидат задоволни и со реми.
За македонската јавност, натпреварот беше во фокусот поради настапот на Елиф Елмас, кој доби шанса како стартер, но за жал, не ја искористи на најдобар начин.
Елмас бледо издание, Конте реагираше со измена
Македонскиот „дијамант“ беше дел од почетната постава на позицијата офанзивен играч за врска, зад напаѓачот Хојлунд. Иако имаше една добра шанса во 8-мата минута кога неговиот удар беше одбранет од голманот Монтипо, Елмас генерално одигра под своите можности.
Неговата игра беше оценета со 6 од италијанските медиуми, што е меѓу послабите оценки во тимот. Конте реши да го повлече од игра во 62-тата минута, заменувајќи го со Лука Маријанучи, по што Наполи заигра поангажирано и успеа да израмни.
„Елмас се обиде, но не успеа да остави силен печат на натпреварот“, стои во една од анализите.
Од 0-2 до 2-2: Камбек на шампионот
Верона шокираше со головите на Фресе (16’) и Орбан од пенал (27’). Сепак, Наполи покажа карактер во второто полувреме. Скот Мектоминеј намали на 1-2 во 54-тата минута, а капитенот Џовани Ди Лоренцо го спаси бодот со гол во 82-тата минута.
