Екипата на Брентфорд испушти златна можност дополнително да ги зацврсти своите амбиции за пласман во Лигата на шампионите, откако на домашен терен ремизираше 2:2 против последнопласираниот Волвс. Иако имаа сигурно водство, избраниците на Кит Ендрјус дозволија камбек на гостите и останаа без планираните три бода.
Игор Тијаго со јубилеј по повикот од Анчелоти
Натпреварот започна идеално за домаќините. Мајкл Кајоде го постигна својот деби-гол за водство од 1:0, а само неколку минути подоцна, новиот бразилски репрезентативец Игор Тијаго ја затресе мрежата за 2:0. За Тијаго ова беше јубилеен 20-ти гол во сезоната, потврдувајќи ја својата страшна форма само неколку часа откако го доби првиот повик за Бразил од Карло Анчелоти.
Волвс се врати од „мртвите“
Наместо рутинска завршница, Волвс покажа заби пред паузата преку Адам Армстронг, кој со прекрасен удар намали на 2:1. Во вториот дел, Брентфорд делуваше несигурно, а казната стигна во 77. минута кога нигерискиот напаѓач Толу Арокодаре со глава ги постави конечните 2:2. Гостите дури имаа шанса и за целосен пресврт, но Арокодаре ја погоди пречката во финишот.
Со овој кикс, Брентфорд останува на седмата позиција на табелата. Победи би ги донела на само два бода зад петтопласираниот Ливерпул. Иако пред почетокот на сезоната беа сметани за аутсајдери за опстанок, „пчелите“ сега се во борба за историски прв излез во Европа во нивната 134-годишна историја.
