Додека очите на јавноста беа вперени кон „Етихад“, остатокот од премиерлигашките терени понуди вистински спектакл, но и многу гнев. Од црвени картони во Западен Лондон, до емотивни разделби во Борнмут и историски рекорди кај „пчелите“, ова коло дефинитивно ќе се памети по хаосот.
„Сините“ во слободен пад: Фулам е победи во Западен Лондон
Новиот менаџер на Челси, Лијам Росениор, го гледаше денешниот меч од трибините. Неговите нови избраници беа поразени од лутиот ривал Фулам со 2-1, а навивачите на Челси веќе го губат трпението, истакнувајќи транспаренти против сопствениците.
Проблемите почнаа во 22-та минута кога Марк Кукуреља заработи директен црвен картон – веќе осми за Челси оваа сезона! Иако Рори Делап успеа да го поништи водството на Раул Хименез, пресудниот удар го зададе Хари Вилсон во 81-та минута, оставајќи го Челси на очајното седмо место на табелата.
Вила „заглави“ во лондонската магла: Воткинс пропушти шанса за историја
Тимот на Унаи Емери, кој важи за еден од најсериозните кандидати за висок пласман, пропушти златна прилика да му се доближи на лидерот Арсенал на само три бода. На гостувањето кај десеткуваниот Кристал Палас, „лавовите“ од Бирмингем одиграа разочарувачки 0-0, со што ја прекинаа својата неверојатна серија од 10 победи во последните 11 натпревари.
Астон Вила имаше шанса за првпат во својата долга клубска историја да стигне до границата од 45 бода по само 21 одигран натпревар, но бедемот на „Селхерст Парк“ остана нескршен. Најблиску до гол беше Оли Воткинс, кој во последните моменти од мечот ја погоди рамката од голот, додека претходно Дин Хендерсон со фантастична одбрана му попречи на патот кон мрежата.
Проблемите за Емери се зголемија уште на полувремето, кога првиот голман Емилијано Мартинез мораше да ја напушти играта поради повреда. На негово место влезе Марко Бизот, кој веднаш се најде на искушение, спречувајќи го ударот на Јеремо Пино. Иако домаќините не знаат за триумф пред своја публика уште од ноември, во последните 30 минути беа многу похрабри и можеа да го казнат заморот кај фаворитот преку Жан-Филип Матета.
Семењо со „бомба“ за збогум: Тотенхем на колена на „Виталити“
Најдраматичниот меч се одигра во Борнмут, каде домаќините славеа над Тотенхем со 3-2. Човек на одлука беше Антоан Семењо, кој во 95-та минута со спектакуларен гол од далечина ја прекина серијата од 11 меча без победа за својот тим.
За Семењо ова беше емотивна ноќ, бидејќи се очекува веќе неделава да го финализира трансферот во Манчестер Сити. Тотенхем водеше преку Матис Тел, па се враќаше во игра со атрактивните „ножички“ на Палиња, но на крајот мораше да му честита на храбриот домаќин.
Бразилецот Тијаго пишува историја кај „пчелите“
Брентфорд продолжува со фантастичните партии, овојпат прегазувајќи го Сандерленд со 3-0. Херој повторно беше Игор Тијаго, кој со два гола стигна до бројката од 16 погодоци сезонава, што најмногу за еден Бразилец во една премиерлигашка сезона во историјата.
Сандерленд можеше да го промени текот на мечот, но Енцо Ле Фе се обиде со „паненка“ од пенал, која голманот Каомин Келехер ја прочита и ја фати со две раце, понижувајќи го изведувачот.
Хаос во Ливерпул: Грилиш и Кин исклучени, Евертон спасуваше бод
Најбизарниот момент на вечерта се случи на дуелот Евертон – Волвс (1-1). Домаќините завршија со девет играчи откако Мајкл Кин доби црвен картон затоа што го повлече за коса противничкиот напаѓач Толу Арокодаре. Веднаш по него, во соблекувалната беше испратен и Џек Грилиш, кој заработи два жолти картони за само три минути поради приговори кон судијата.
Астон Вила, пак, пропушти шанса да му се доближи на Арсенал, одигрувајќи само 0-0 против Кристал Палас на гости, и покрај неколкуте зрели шанси на Оли Воткинс.
