Мајкл Керик останува непоразен на клупата на Манчестер Јунајтед, но неговата серија од четири последователни победи дојде до својот крај во дождливиот источен Лондон.
„Црвените ѓаволи“ се извлекоа со бод против Вест Хем (1-1), благодарение на голот на Бенјамин Шешко во буквално последната секунда од судиското продолжение.
„Ферги-тајм“ во режија на Керик
Вест Хем, под водство на Нуно Еспирито Санто, одигра одличен тактички меч и поведе во 50-та минута преку Томаш Соучек. Домаќините успеаја да го неутрализираат средниот ред на Јунајтед, а на гостите не им помогна ниту поништениот гол на Касемиро поради офсајд.
Кога изгледаше дека трите бода ќе останат кај „чеканите“, Керик се одлучи на коцка во стилот на својот ментор, Сер Алекс Фергусон. Го извади бекот Далот, го внесе Зиркзе и премина на формација со тројца во одбрана, оставајќи огромен простор за контранапади на противникот.
Вест Хем пропушти три чисти шанси да го реши мечот, а казната стигна сурово – Шешко се најде на вистинското место и со прецизен удар го совлада Мадс Хермансен за 1-1.
Поглед кон табелата: Јунајтед останува во „Топ 4“
Иако победничката серија е прекината, навивачите на Јунајтед имаат причина за задоволство. Четири победи и едно реми во првите пет меча на Керик е биланс кој ретко кој го предвидуваше по заминувањето на Рубен Аморим. Со овој бод, Манчестер Јунајтед ја задржува четвртата позиција на табелата, пред Челси кој претходно киксна против Лидс.
За Вест Хем, овој резултат е болен удар во нивната борба за опстанок, откако беа на само неколку секунди од огромна победа над фаворитот.
