Неделата во ФА Купот ни донесе сè што сакаме кај англискиот фудбал – потценет аутсајдер кој руши гигант, гол во последната минута и емотивно враќање на историските патеки.
Порт Вејл: Последен во лигата, меѓу осумте најдобри во Купот!
Најголемата приказна на сезоната доаѓа од Порт Вејл. Иако тимот е закован за дното во Лига 1 (трета лига) и се соочува со испаѓање, во Купот се претворија во вистински „убијци на фаворити“. Со победата од 1-0 против премиерлигашот Сандерленд, Порт Вејл за првпат по цели 72 години (од 1954 година) се пласираше во четвртфиналето!
Херој на натпреварот беше Бен Вејн, кој како голем навивач на Њукасл, со посебно задоволство ја затресе мрежата на „Црните мачки“.
„Не ни сфатив дека сме во четвртфиналето! Неверојатно е, ова е нешто што не сум го ни сонувал“, изјави возбудениот Вејн по натпреварот.
Сандерленд доминираше, но без Гранит Џака во средниот ред ја загуби контролата на темпото, а Порт Вејл со фанатична одбрана го издржа притисокот и славеше историски успех.
Драма на „Крејвен Котиџ“: Саутемптон го „урна“ Фулам во 91-та минута
Саутемптон продолжува со својата неверојатна преродба под водство на Тони Екерт. „Светците“, кои во ноември беа на дното на Чемпионшип, сега се во четвртфиналето на ФА Купот по победата од 1-0 на гости кај Фулам.
Одлучувачкиот момент се случи во судиското продолжение кога Јоаким Андерсен го собори Азаз во шеснаесеттникот, а Рос Стјуарт беше ладнокрвен од белата точка. Фулам имаше дури 24 удари кон голот, им беа поништени два гола (едниот контроверзно поради движење на топката при гол-аут), но на крајот останаа со празни раце против тимот кој е во серија од 10 меча без пораз.
Лидс Јунајтед се врати во четвртфиналето по две децении
Лидс Јунајтед не дозволи изненадување на „Еланд Роуд“ и со убедливи 3-0 го совлада Норич. Ова е прво четвртфинале за Лидс по повеќе од 20 години (сезона 2002/03).
Тимот на Даниел Фарке го реши мечот уште во првото полувреме со головите на Шон Лонгстаф и Габриел Гудмундсон, а точка на победата стави Џоел Пиро со прекрасен погодок во финишот. Оваа победа е вистински мелем по разочарувањето во Премиер лигата и доказ дека тимот има длабочина во составот за да се бори на два фронта.
