Барселона пропушти златна можност да се врати на чело на Ла Лига, откако претрпе неочекуван пораз од 2:1 на гостувањето кај Џирона на „Монтиливи“. Иако избраниците на Хенси Флик доминираа во поголемиот дел од мечот, серијата промашувања и падот на концентрацијата во финишот ги чинеа прескапо против мотивираниот домаќин.
Ламин Јамал трагичар, Кубарси во историјата
Првото полувреме помина во знакот на промашувањата на гостите. Рафиња ја погоди стативата, а во последната секунда од првиот дел, по прекршокот над Дани Олмо, Барса доби пенал. Сепак, младиот Ламин Јамал биеше непрецизен и ја погоди рамката од голот, оставајќи ги почетните 0:0 на семафорот во Џирона.
Радоста за „Блауграна“ пристигна во 62-та минута кога Пау Кубарси го постигна својот деби-гол во Ла Лига. Младиот дефанзивец со супериорен скок по центаршутот на Кунде ја затресе мрежата на Газанига за водство од 0:1.
Кошмарен финиш и казна од Белтран
Наместо рутински да го приведат мечот до крај, одбраната на Барса „заспа“. Само две минути по водството, домаќините искористија невнимание преку Томас Лемар кој израмни на 1:1. Џирона доби крилја, а нивниот голман со две фантастични интервенции спречи нов гол за гостите.
Целосниот шок пристигна во 86-та минута. Фран Белтран со прецизен низок удар го совлада Жоан Гарсија за 2:1, предизвикувајќи делириум на трибините кај навивачите на бело-црвените. Иако Џирона го заврши мечот со десет играчи по црвениот картон на Рока, Барса немаше време за поврат.
Реал Мадрид сега диктира темпо
Со овој пораз, Барселона останува на два бода зад Реал Мадрид во оваа возбудлива трка за титулата. За Џирона ова е огромна победа која го прекинува лошиот облик од четири натпревари без триумф, додека за Хенси Флик ова е горчлива лекција дека во каталонските дербија нема фаворити.
