Екипата на Тиквеш успеа да ја оствари својата прва „вистинска“ гостинска победа оваа пролет, славејќи со минимални, но заслужени 0:1 против Македонија ЃП. Во натпревар кој го затвори 19-то коло, „лозарите“ покажаа карактер и трпение, додека „Лавовите“ остануваат во опасната зона со многу грижи за иднината.
ВАР го поништи голот на Сила, Јанков правеше чуда
Натпреварот започна со иницијатива на гостите од Кавадарци. Голманот на домаќините, Јанков, беше најзаслужен што мрежите мируваа во првиот дел, откако со фантастични интервенции ги сопре обидите на Стојковски, Вареловски и Ацковски.
Драмата кулминираше во 55-тата минута. Сила постигна одличен гол по акција од левата страна, но по долготрајна ВАР проверка, судиите одлучија дека претходела офсајд позиција, па славјето на кавадарчани беше привремено прекинато.
„Џокерот“ Лусиалињо за конечен триумф
Клучниот момент се случи во 77-та минута. Човекот на одлука беше бразилскиот интернационалец Лусиалињо, кој влезе во игра во вториот дел како тактичко решение на стручниот штаб. Акцијата тргна од десната страна преку Стојанов, кој мајсторски го проигра Сила. Неговиот удар не заврши директно во голот, но на втората статива пристигна Лусиалињо, кој осамен ја смести топката во мрежата за огромна радост.
Состојба на табелата
Со овој триумф, Тиквеш се искачува на седмата позиција со 24 бодови и полека ги остварува амбициите на Ацковски за приклучок кон горниот дел. Македонија ЃП останува на десеттото место со 19 бодови, што значи дека секое следно коло за нив навистина ќе биде како „финале“, како што најави капитенот Пецов.
