Екипата на МРК Куманово со стил ја затвори 2025 година, остварувајќи убедлива победа од 32-19 против директниот ривал РК Струга во рамките на 18. коло од Суперлигата.
Ова е само трета победа за кумановци сезонава, но исклучително важна бидејќи досега единствените бодови ги освојуваа против „фенерџијата“ Радовиш. Струга стана само вториот тим во лигата кој падна пред четата на Љубиша Димковски.
Цековски и Стојков диригираа
Натпреварот беше израмнет само во првите 20-тина минути. Потоа, домаќините ја презедоа контролата и на полувреме заминаа со солидни 15-10. Второто полувреме започна фуриозно за Куманово. Расположениот Борјан Цековски влезе во серија и брзо донесе двоцифрена предност (21-11), со што практично го реши победникот.
„Победата на нашата екипа не беше доведена во прашање во ниту еден момент, затоа што имавме контрола врз резултатот и играта,“ објавија од МРК Куманово.
Најдобри поединци
Во победничкиот тим, Александар Стојков и Борјан Цековски беа најефикасни со по 6 погодоци. Кај поразената Струга, единствен расположен за игра беше Стефан Атанасовски, кој исто така постигна 6 гола.
Со овој триумф, Куманово скокна на 10. позиција на табелата со 7 бодови, прескокнувајќи ја токму Струга која сега е 11-та со 6 бодови.
