Италијанската Серија А понуди драма и пресврти на врвот на табелата. Интер го доби големото дерби против Лацио со 2-0 и се израмни на лидерската позиција со Рома, додека македонскиот репрезентативец Елиф Елмас и неговиот Наполи доживеаја тежок пораз во Болоња, продлабочувајќи ја кризата на актуелниот шампион.
Интер 2-0 Лацио: Лаутаро го „скрши мразот“ и го збриша Лацио
„Нероаѕурите“ ја искористија шансата да се искачат на врвот на табелата, демонстрирајќи сила на „Сан Сиро“ против Лацио. Тимот од Рим влезе во мечот со серија од шест натпревари без пораз и четири последователни недопрени мрежи, но таа серија беше брутално прекината уште во треттата минута.
Лаутаро Мартинез го „скрши мразот“, не само на Лацио, туку и својот. По одземената топка од Бастони, аргентинскиот напаѓач постигна гол од внатрешноста на шеснаесеттникот. Ова беше прв погодок за Лаутаро по сушни пет натпревари во Серија А, кој како да му даде крилја на целиот тим.
Нападот на Интер продолжи да притиска, а прашањето на победникот беше решено во второто полувреме. Федерико Димарко од левата страна испрати совршено темпирана топка, која Анж-Јоан Бони од шест метри ја смести во мрежата за 2-0.
Имаше и драма со ВАР кога голот на Пјотр Зиелински беше поништен по прегледување на снимката поради играње со рака на Димарко во нападот. Лацио се обиде да се врати, а најблиску беше Марио Џила, чиј удар со глава заврши во внатрешната страна на стативата, но гол-технологијата потврди дека топката не ја поминала целата линија.
Интер доминираше и заслужено славеше за да ја преземе лидерската позиција, демонстрирајќи дека се сериозни кандидати за титулата.
Криза во Наполи: Елмас и шампионот три меча без гол!
Актуелниот шампион Наполи денес доживеа сериозен удар. Тимот на Елиф Елмас ja пропушти шансата да се одвои на врвот, губејќи со 2-0 на гостувањето кај одличната Болоња.
Домаќините, кои се во извонредна форма со 10 натпревари без пораз, ги шокираа фановите на Наполи во второто полувреме. Тајс Далинга го отвори резултатот во 50. минута, а победата ја запечати Џон Лукуми со својот прв гол во сезоната, по голема грешка во одбраната на гостите.
Статистиката е најголемиот показател за кризата на тимот на Антонио Конте: Наполи во второто полувреме создаде очекувани голови (xG) од само 0.05, што ја покажува нивната немоќ во нападот.
Најзагрижувачкиот факт за навивачите е дека Наполи не постигнал гол на последните три натпревари, низа што е неприфатлива за еден шампион. По овој пораз, Наполи падна на четвртото место на табелата, веднаш зад лутиот ривал Милан кој е на треттата позиција.
Резултати од останатите денешни натпревари:
- Рома 2-0 Удинезе: Рома славеше со чиста победа и го искористи поразот на Наполи за да се израмни со Интер на врвот.
- Џенова 2-2 Фиорентина: Во интересен натпревар, тимовите поделија по бод.
- Аталанта 0-3 Сасуоло: Возбудлив меч во Бергамо, три погодоци за Сасуоло.
Серија А продолжува да биде една од најдраматичните лиги во Европа. Дали Интер ќе го задржи водството или Рома може да направи изненадување?
Следете нè: Facebook | Instagram | X
