Екипата на Манчестер Сити е новиот освојувач на Карабао Купот, откако во големото финале на „Вембли“ го совлада лондонски Арсенал со 2:0. Херој на „Граѓаните“ беше младиот дефанзивец Нико О’Рајли, кој со два гола за само четири минути го реши прашањето на победникот.
Со овој триумф, Пеп Гвардиола испиша историја, станувајќи првиот менаџер кој пет пати го освоил овој трофеј (претходно го делеше рекордот со Клаф, Фергусон и Мурињо кои имаат по четири).
Фатална грешка на Кепа
По изедначеното прво полувреме, во кое голманот на Сити, Џејмс Трафорд, блесна со тројна одбрана пред Каи Хаверц и Букајо Сака, клучниот момент се случи во 60. минута.
Микел Артета одлучи да остане доследен на својата политика и шанса на голот да му даде на Кепа Аризабалага наместо на првиот голман Давид Раја. Оваа одлука се покажа како фатална. Шпанецот направи катастрофална грешка при едно рутинско нафрлување на Рајан Шерки, испуштајќи ја топката право на глава на О’Рајли кој лесно ја смести во празната мрежа.
Само четири минути подоцна, О’Рајли повторно се најде на вистинското место. По одличниот центаршут на Матеус Нунеш, тој со нов прецизен удар со глава зголеми на 2:0, фрлајќи ги навивачите на Сити во делириум, а Гвардиола во трк покрај аут-линијата.
Арсенал се обиде да се врати, но ударите на резервистите Калафиори и Габриел Жезус завршија во рамката од голот.
Со овој пораз, згаснаа надежите на Арсенал за освојување на историска „квадрупл“ круна оваа сезона, додека чекањето на прв трофеј по ФА Купот во 2020 година продолжува. Од друга страна, Манчестер Сити го освои својот деветти трофеј во Лига Купот, доближувајќи се на само еден трофеј од рекордерот Ливерпул (10).
