Во светот на фудбалот, дебатата за најдобар на сите времиња веројатно никогаш нема да заврши. Но, кога станува збор за статистиката, бројките не лажат. Лионел Меси ноќеска испиша уште една страница во фудбалската историја, станувајќи официјално најдобар асистент во историјата на репрезентативниот фудбал.
Со двете асистенции на пријателскиот натпревар против Порторико, аргентинскиот “маг” стигна до бројката од 60 асистенции, со што го надмина својот поранешен соиграч, Нејмар, и се искачи на врвот на вечната листа.
Листата на “кралевите на асистенции”
Ова е уште еден доказ за неверојатната сестраност на Меси. Тој не е само голгетер, туку и врвен плејмејкер, играч кој ги прави своите соиграчи подобри. Погледнете ја листата на најдобрите пет:
- Лионел Меси (Аргентина) – 60 асистенции
- Нејмар (Бразил) – 59 (или 58) асистенции
- Лендон Донован (САД) – 58 асистенции
- Ференц Пушкаш (Унгарија) – 53 асистенции
- Кевин Де Брујне (Белгија) – 53 асистенции
Нејмар и Донован – двајца “потценети” генијалци
Оваа листа отвори и интересна дебата за наследството на другите играчи. Многумина истакнаа дека второто место на Нејмар е можеби уште поимпресивно, со оглед на тоа што тој со години “ја носеше на грб најслабата генерација на Бразил во поновата историја”. Со 41% директно учество во головите (гол или асистенција), неговото влијание е неверојатно.
Исто така, присуството на Американецот Лендон Донован на третото место, пред легенди како Пушкаш и Де Брујне, човекот кому само Македонија му ја расипа статистиката, е доказ за неговата потценета големина и статус на најдобар американски фудбалер на сите времиња.
Бескрајната трка со Роналдо
Како и секогаш, приказната за Меси не може да помине без споредба со Кристијано Роналдо. Интересно е што овој рекорд на Меси доаѓа само неколку дена откако Роналдо стана најдобар стрелец во историјата на квалификациите за Светските првенства.
Овие двајца, дури и во четвртата деценија од животот, продолжуваат да се натпреваруваат, да соборуваат рекорди и да ја испишуваат историјата на најважната споредна работа на светот.
На крајот, можеме само да бидеме среќни што живееме во нивната ера.
