Попладне за „плус 7“ во Првата македонска фудбалска лига. Вкупно 15 гола паднаа на само два натпревари, каде Шкендија и Силекс немаа апсолутно никаква милост и приредија „стрелачки тренинг“ против трагичните Македонија ЃП и Шкупи.
(Видео) Шкендија 7-2 Македонија ЃП
Во Тетово се одигра натпревар кој беше сè само не фер борба. Шкендија славеше со 7-2, но против тим кој не личеше на прволигаш.
По оставките на директорот Бајевски и тренерот Грнчаров, „лавовите“ во Тетово истрчаа со комбиниран младински состав – дури девет играчи под 18 години и само двајца странци (Еступињан и Кабаркас).
И покрај катастрофата, за Ѓорче остануваат два светли моменти: младиот Аљман Етеми кој намали на 2-1 и голманот Дарко Јовчев, кој му одбрани пенал на Фитон Адеми.
За Шкендија, која рутински ја заврши работата, стрелци беа Мазари (x2), Рамадани, Мелиќи, Адеми, Белица и Латифи. Омер Сулејмани во финишот го постави конечниот резултат.
(Видео) Силекс 5-1 Шкупи
Во Кратово, слично сценарио. Силекс го „потопи“ Шкупи со 5-1 и му стави крај на мини-серијата од два меча без победа.
Работата беше завршена уште во првото полувреме, кое кратовци го добија со брутални 4-0. Алиќ и Мартин Мирчевски постигнаа по два гола, а им се придружи и Мигел Пиреш.
Шкупи, кој останува „закован“ на дното на табелата со само еден бод, успеа да постигне само утешен гол преку Рибеиро за 4-1.
