Париз Сен-Жермен ќе има шанса да ја одбрани европската круна откако во реванш натпреварот во Минхен успеа да ја сочува предноста против Баерн и да се пласман во големото финале на Лигата на шампионите. Иако реваншот на „Алијанц Арената“ не го понуди истиот гол-гетерски спектакл како првиот меч во Париз (5-4), квалитетот и возбудата беа присутни до последната секунда.
Натпреварот започна шокантно за домашните навивачи кои претходно приредија спектакуларно тифо. Уште во 3. минута, грузискиот мајстор Хвича Кварацхелија направи одличен продор и центрираше до Усман Дембеле, кој со силен удар донесе рано водство за ПСЖ.
Баерн немоќен пред дефанзивата на „светците“
Во електрична атмосфера, избраниците на Венсан Компани неуморно се обидуваа да се вратат во игра, но дефанзивата на Луис Енрике успешно го изолираше Хари Кејн во поголемиот дел од мечот. Првото полувреме го одбележа и спорна ситуација кога домашните бараа пенал откако топката го погоди во рака Жоао Невеш, но судиите не покажаа на белата точка бидејќи топката претходно беше исфрлена од негов соиграч.
Во вториот дел ПСЖ беше поконкретен преку Дезире Дуе, но Мануел Нојер со неколку одлични интервенции го држеше Баерн во живот. Кога веќе сè изгледаше решено, Хари Кејн го постигна својот 55-ти гол во сезоната длабоко во судиското надополнување, но тоа беше само слаба утеха за „баварците“.
Финале во Будимпешта: ПСЖ против Арсенал
Со вкупен резултат од 6-5, ПСЖ продолжува кон одбрана на титулата. Финалниот дуел против Арсенал е закажан за сабота, 30 мај, на стадионот во Будимпешта, каде ќе се одлучува новиот владетел на Европа.
