Апсолутен шок, катастрофа и историски ден во Формула 1. Квалификациите за Големата награда на Бразил донесоа сценарио кое никој не можеше да го предвиди: лидерот во шампионатот, Ландо Норис, доминантно стигна до пол-позицијата, додека неговиот ривал Макс Верстапен доживеа историски дебакл, завршувајќи на 16-то место и испаѓајќи уште во Q1!
Ова е првпат во целата кариера на Верстапен тој да биде елиминиран во Q1 на чиста брзина.
Дебаклот на Ред Бул: Коцкањето кое заврши катастрофално
Верстапен се мачеше цел викенд, жалејќи се на лошиот болид. Тимот на Ред Бул одлучи да се „коцка“ пред квалификациите. Новиот шеф, Лоран Мекис, призна дека направиле „смели промени“ во сетапот, надевајќи се дека ќе го поправат болидот.
Експериментот доживеа спектакуларен неуспех.
Верстапен беше бесен преку тимското радио, жалејќи се на „нула грип“ и дека „лизга насекаде“. „Беше лошо. Не можев воопшто да притиснам. Болидот беше насекаде. Морав да возам побавно само за да не излетам, а тоа не функционира во квалификации“, изјави шокираниот Верстапен.
Кога новинарите го прашаа за шансите за титулата, тој само кратко одговори: „Можете да заборавите на тоа“.
За да биде дебаклот на Ред Бул комплетен, и вториот возач, Јуки Цунода, испадна во Q1 и ќе стартува од 19-то место.
Норис перфектен, Антонели е новата ѕвезда!
Додека Ред Бул се распаѓаше, Ландо Норис беше во свој елемент. Иако згреши на првиот брз круг во Q3, Британецот го „закова“ својот последен обид и стигна до пол-позицијата со 0.174 секунди предност.
Вистински херој на денот, покрај Норис, е рукито на Мерцедес, Кими Антонели. Италијанецот повторно возеше како ветеран и се избори за неверојатно второ место, обезбедувајќи старт од првиот ред.
Ривалот на Норис за титулата, Оскар Пиастри (Мекларен), имаше лош последен круг и падна на четвртото место, веднаш зад Шарл Леклер во Ферари.
Хамилтон „изгубен“ во Q2, Хаџар и Берман импресионираа
Денот беше катастрофален и за другиот голем шампион на гридот. Луис Хамилтон (Ферари) не успеа да влезе во Q3 и ќе стартува од очајното 13-то место.
Најпријатни изненадувања во топ 10 беа младите возачи: Исак Хаџар (Рејсинг Булс) кој ќе стартува 5-ти и Оли Берман (Хаас) кој беше одличен и заврши на 8-то место.
Трката во Бразил утре ќе биде вистински спектакл. Норис ќе стартува прв со огромна шанса да ја зголеми предноста, додека Верстапен ќе мора да прави чуда од 16-то место.
Следете нè: Facebook | Instagram | X
