Четвртфиналето на Шкотскиот куп меѓу Ренџерс и Селтик ќе остане запаметено по срамните сцени кои го засенија пласманот на „Детелините“ во полуфиналето. По драматичната победа на Селтик на пенали, илјадници навивачи влегоа на теренот, предизвикувајќи физички пресметки и судири со полицијата.
“It is an ugly, ugly end to what has been a superb game of football”
— Premier Sports (@PremSportsTV) March 8, 2026
Chaos breaks out on the pitch at Ibrox as both sets of fans end up on the pitch following Celtic’s penalty shootout win over Rangers pic.twitter.com/m8cmSHEkGM
Цванчара го реши дербито, навивачите го прекинаа славјето
По 120 минути без голови, патникот во следната рунда се одлучуваше преку пенал-рулетот. Клучниот момент му припадна на Томаш Цванчара, кој го реализираше победничкиот пенал пред домашната публика. Но, веднаш по голот, ситуацијата излезе од контрола.
Навивачи на Селтик влетаа на теренот за да слават со играчите, на што навивачите на Ренџерс одговорија со масовно влегување на теренот, многумина од нив носејќи сини маски за да го сокријат идентитетот. Полицијата и стјуардите беа принудени да формираат жив штит на работ на казнениот простор за да ги разделат двете завојувани страни, додека кон нив летаа предмети и пиротехнички средства.
Остра осуда од полицијата и Фудбалската асоцијација
Главниот суперинтендент, Кејт Стивен, го опиша однесувањето на навивачите како „срамно и за секоја осуда“.
„Полицајците и редарите беа соочени со екстремно непријателство и насилство. Многу поединци беа вооружени со предмети наменети за нанесување штета. Повредени се полицајци и граѓани во ова одвратно однесување“, стои во официјалното соопштение.
Истрагата ќе опфати и инциденти пред почетокот на мечот, кога навивачи на Селтик насилно влегле на трибината „Брумлоан Роуд“ без влезници, принудувајќи ја полицијата привремено да ги затвори влезовите.
Мартин О’Нил: „Ова е експлозивно дерби, едно од најдобрите“
Додека тренерот на Ренџерс, Дани Рол, изјави дека не видел ништо бидејќи веќе бил во тунелот, легендарниот менаџер на Селтик, Мартин О’Нил, имаше свое видување за „жешката“ атмосфера.
„Олд Фирм натпреварите се експлозивни, отсекогаш биле. Можеби тоа е една од причините зошто ова дерби е едно од најдобрите во светот. Се надевам дека ова нема да ја намали важноста на карактерот што го покажавме“, изјави О’Нил.
Селтик е во полуфиналето, но шкотскиот фудбал сега се соочува со сериозни казни и истрага која сигурно ќе донесе многу суспензии за „најжестокото“ дерби на Островот.
