Една ера во светот на тенисот денеска официјално заврши. Легендарниот Стен Вавринка, човекот кој со својот нестварен еднорачен бекхенд ги покори најголемите, го одигра својот последен натпревар на Австралија Опен. На 40-годишна возраст, во својата последна сезона на АТП турнејата, „Стен Д Мен“ се збогуваше со Мелбурн Парк, местото каде што во 2014 година ја освои својата прва Грен слем титула.
Достоен отпор против Фриц за крај на патувањето
Вавринка не замина тивко. По херојските победи во првите две кола, Швајцарецот денеска покажа дека сè уште има „магија“ во неговата десна рака, но на крајот остана без сили против деветтиот носител, Тејлор Фриц. Американецот славеше со 7-6(5), 2-6, 6-4, 6-4, ставајќи крај на 20-то и последно учество на Стен во Мелбурн.
По последниот поен, преполната „Џон Кејн Арена“ се крена на нозе. Громогласните аплаузи и овации траеја со минути, додека Вавринка со солзи во очите се обидуваше да ги прибере емоциите гледајќи го видео-колажот со неговите најголеми моменти на големиот екран.
The Melbourne crowd gave Stan Wawrinka a standing ovation after his final Australian Open match ❤️#AusOpen pic.twitter.com/alu573SoT2
— TNT Sports (@tntsports) January 24, 2026
Стен во стилот на „Stone Cold“: Сега е време јас да пијам!
Но, бидејќи тоа е Стен, збогувањето не можеше да биде само тажно. Наместо класичен говор, Вавринка реши да ги насмее сите и да замине како вистинска легенда.
„Сите овие години ве гледав како уживате во тенисот, ве гледав како нè поддржувате, ве гледав како пиете… е па сега е ред на мене јас да уживам!“, изјави низ смеа Стен.
Веднаш потоа, во стилот на кечерската легенда Стив Остин, Вавринка дотрча до торбата, извади две ладни пива и на сред терен наздрави со првиот човек на Австралија Опен, Крег Тајли. Тоа беше совршен крај за човекот кој секогаш беше миленик на публиката поради својата борбеност, искреност и автентичност.
Stan Wawrinka pulls a Stone Cold Steve Austin and pulls out a beer during his last Australian Open
— The Tennis Letter (@TheTennisLetter) January 24, 2026
What a legend
😭😭😭😭😭😭 pic.twitter.com/Kj4mZ3kwU9
Стен, ти благодариме за сите спомени. Мелбурн никогаш нема да те заборави!
