Македонскиот репрезентативен голман Столе Димитриевски и неговата Валенсија претрпеа минимален пораз од 1-0 на гостувањето кај Реал Овиедо во рамките на 28. коло од Ла Лига. И покрај неколкуте фантастични интервенции на нашиот чувар на мрежата, „Лилјаците“ не успеаја да извлечат бод од ова тешко гостување.
Столе со „паради“ го чуваше тимот во игра
Натпреварот во Овиедо се играше под силен дожд, што дополнително ја отежна работата на двата тима. Иако Валенсија започна офанзивно, домаќините беа тие кои први ја затресоа мрежата. Во 30-та минута, дефанзивецот Давид Костас одлично се снајде во шеснаесеттникот по една повратна топка и успеа да го совлада Димитриевски за водство од 1-0.
Само две минути по примениот гол, македонскиот голман со „парада“ спречи зголемување на водството, а неговата серија на клучни одбрани продолжи и на самиот старт на второто полувреме кога со неверојатен рефлекс го сопре ударот со глава на Вињас.
Јалова иницијатива и поништен гол на домаќинот
Тренерот Карлос Корберан се обиде да го промени текот на мечот со тројна измена, воведувајќи ги Уго Дуро и Луис Риоха, по што Валенсија почна да го притиска противникот во неговата половина. Најблиску до израмнување беше капитенот Гаја, чиј силен удар беше со крајни напори одбранет од домашниот голман Ескандел.
Драмата го достигна врвот во 77-та минута кога Реал Овиедо постигна втор гол преку Реина, но по долготрајна ВАР проверка, погодокот беше поништен поради офсајд. Во самиот финиш, Димитриевски уште еднаш мораше да интервенира при еден контра-напад на Хасан за да спречи поубедлив пораз.
Валенсија останува без бодови на ова гостување, а следната шанса за поправен испит Столе и неговите колеги ќе ја имаат веќе наредната сабота на жешкиот терен во Севиља.
