Тотенхем изведе еден од најневеројатните пресврти оваа сезона во Премиер лигата, враќајќи се од „мртвите“ против актуелниот шампион Манчестер Сити. Од целосно понижени во првиот дел, до еуфорија по фантастичниот гол на Доминик Соланке, „Спарси“ извлекоа 2-2 и го оставија Пеп Гвардиола во очај.
Доминација на Сити и свирежи на „Тотенхем Стадиум“
Првите 45 минути беа вистински кошмар за тимот на Томас Френк. Сити си поигруваше со домаќините, а доминацијата ја крунисаа Рајан Шерки и Антоан Семењо за убедливи 0-2. Навивачите на Тотенхем со жестоки свирежи ги испратија своите играчи во соблекувалната, додека Сити изгледаше како веќе да ги впишал трите бода на своето конто.
„Скорпионот“ на Соланке за делириум
Сепак, второто полувреме донесе сосем поинаква слика. Сити влезе премногу опуштено, а Тотенхем почна да „гризе“. Надежта ја врати Доминик Соланке со првиот гол, иако гостите бурно реагираа сметајќи дека имало прекршок врз Марк Геи.
Кулминацијата се случи во финишот кога Соланке направи нешто што ретко се гледа. По центаршутот на Конор Галагер, топката му падна зад грбот, но напаѓачот со неверојатна импровизација и т.н. „скорпион удар“ ја префрли преку Џанлуиџи Донарума за конечни 2-2.
Арсенал сега „бега“ на +6
Овој резултат е огромен удар за амбициите на Сити за титулата, бидејќи сега заостануваат шест бода зад лидерот Арсенал. Од друга страна, Тотенхем, кој сезонава се мачи на домашен терен (само две победи на 12 меча), покажа карактер кој може да биде пресвртница за тимот.
