Англија останува перфектна, а Србија останува без Светско првенство. Во мечот на „Вембли“, четата на Томас Тухел славеше со 2-0, со што и теоретски ги згасна надежите на „Орлите“ за пласман на Мундијалот 2026.
Дебито на новиот српски селектор, Вељко Пауновиќ, донесе нова енергија и похрабар пристап, но квалитетот на „Гордиот Албион“ беше пресуден.
Сака и Езе ја „решија“ Србија
Англија го отвори резултатот преку Букајо Сака, кој во првото полувреме го искористи невниманието на српската одбрана и го совлада Рајковиќ.
Во вториот дел, Србија се обиде да нападне, но наместо израмнување, доби „ладен туш“. Резервистот Еберечи Езе постигна прекрасен гол со кој ги постави конечните 2-0 и ја потврди доминацијата на Англичаните во групата (7 победи од 7 натпревари).
Пауновиќ: „Изгледавме добро, но можеме подобро“
И покрај поразот, новиот селектор Пауновиќ виде позитивни страни во играта на неговиот тим, кој за првпат по долго време покажа желба за надигрување против фаворит.
„Имавме добри моменти, изгледавме како екипа, но мораме да бидеме поконретни. Ова е само почеток на еден нов процес“, изјави Пауновиќ по мечот.
Костиќ со „бомба“: Да го имавме овој селектор порано…
Најголемата прашина ја крена изјавата на капитенот Филип Костиќ. Во искрен настап пред камерите, тој индиректно (но многу јасно) го „поткачи“ поранешниот селектор Драган Стојковиќ – Пикси.
„Да го имавме овој селектор и овој пристап на натпреварот против Албанија, сигурно ќе беше поинаку“, изјави Костиќ, алудирајќи на клучниот пораз кој веројатно ја чинеше Србија пласман.
Со оваа победа на Албанија над Андора (1-0), нашиот западен сосед го обезбеди баражот, додека Србија го завршува циклусот со разочарување, но и со надеж дека „ерата на Пауновиќ“ ќе донесе подобри денови.
Следете нè: Facebook | Instagram | X
