Никој не ги разбира маратонските мечеви во пет сета како Стен Вавринка. Популарниот „Stan the Man“ денеска приреди вистинска тениска револуција во Мелбурн, станувајќи првиот тенисер на возраст од 40 или повеќе години кој се пласирал во третото коло на Грен слем уште од далечната 1978 година!
Срушен рекордот на Кен Роузвол
Вавринка го прекина 48-годишниот пост со неверојатна победа над францускиот квалификант Артур Геа со 4-6, 6-3, 3-6, 7-5, 7-6 [10-3]. Мечот кој траеше неверојатни четири часа и 33 минути ја претвори „Киа Арената“ во вистински котел, каде 40-годишниот Швајцарец покажа дека сè уште ја поседува магијата со која освои три Грен слем титули.
Со овој триумф, Вавринка се израмни со легендарниот Иван Лендл со по 58 одиграни мечеви во пет сета на АТП ниво – најмногу во „Опен ерата“.
Магијата на бекхендот сè уште трае
Иако годините се тука, Стен „испука“ дури 63 директни поени, од кои 13 беа неговиот заштитен знак – разорниот еднорачен бекхенд. Ова е негово прво појавување во шеснаесетфиналето во Мелбурн по 2020 година, успех кој многумина сметаа дека е недостижен за него во оваа фаза од кариерата.
„Ова е мојот последен Австралија Опен, па се трудам да траам што е можно подолго. Секогаш ќе се борам и ќе го оставам срцето на теренот. Не знам како ќе се опоравам, но пресреќен сум… мислам дека заслужив едно пиво вечерва“, изјави Вавринка низ насмевка по големата победа.
Следен предизвик: Тејлор Фриц
Вавринка сега ќе мора експресно да ги одмори своите 40-годишни мускули, бидејќи во сабота го очекува дуел со деветтиот носител, Тејлор Фриц. Швајцарецот води со 2-1 во меѓусебните дуели, но нивната последна битка беше во 2023 година. Американецот е фаворит, но Стен покажа дека кога се игра во пет сета сè е можно.
