Македонската фудбалска репрезентација се подготвува за еден од најважните натпревари во својата историја, а дел од навивачите веќе го одбројуваат времето до заминувањето за Данска. Организаторот на полуфиналниот бараж натпревар за пласман на Светското првенство соопшти дека дистрибуцијата на влезниците започнува од понеделник.
Проверете ги вашите мејл адреси
Сите навивачи кои веќе купиле билети за секторот предвиден за македонската репрезентација, своите влезници ќе ги добијат во електронска форма. Почнувајќи од почетокот на следната недела, билетите ќе бидат испратени на мејл адресите оставени при купувањето.
Организаторите апелираат до навивачите да ги проверат своите адреси (вклучувајќи ги и „spam“ папките) за навреме да ги обезбедат своите ваучери.
Уште малку влезници во продажба
За оние кои сè уште се двоумат, информациите од Данска велат дека останал уште многу мал број на билети за македонскиот сектор на стадионот „Паркен“. Интересот е огромен, па се очекува нашите репрезентативци да имаат силна и гласна поддршка од трибините против моќните Данци.
Натпреварот помеѓу Данска и Македонија е закажан за 26 март, со почеток во 20:45 часот. Победникот од овој дуел ќе се пласира во големото финале на баражот, каде ќе се бори за директен билет за Мундијалот.
