Селекторот на Колумбија, Нестор Лоренцо, го објави конечниот список од 26 фудбалери кои ќе ја претставуваат нацијата на претстојното Светско првенство 2026 година. По болното пропуштање на претходниот Мундијал во Катар, „Лос Кафетерос“ се враќаат на најголемата сцена со проверени сили, а главната вест во Јужна Америка е вклучувањето на капитенот и живата легенда, Хамес Родригез.
Лоренцо реши целосно да му верува на јадрото на тимот кое пред две години стигна до големото финале на Копа Америка, со надеж дека тој препознатлив хемиски спој може да донесе висок дострел и на терените во САД, Мексико и Канада.
Стравови за кариерата и само 194 минути на теренот
Повикот за Хамес Родригез до последен момент беше под огромен знак прашање поради исклучително тешката и бурна сезона зад него. Новиот фудбалер на Минесота Јунајтед одигра само 194 минути во МЛС лигата (започна како стартер на само два меча), откако во март неговото здравје сериозно се влоши.
За време на пријателскиот меч против Франција, Хамес колабираше со сериозни знаци на дехидратација и помина три дена во болница под строг медицински надзор. Во американските медиуми веднаш се раширија драматични гласини дека 34-годишниот плејмејкер боледува од рабдомиолиза – опасна состојба на распаѓање на мускулното ткиво која може да биде опасна по животот. Иако неговиот клуб Минесота остро ги демантираше овие шпекулации, јасно е дека златната копачка од Мундијалот во 2014 година доаѓа во репрезентацијата без никаков натпреварувачки ритам. Сепак, неговиот авторитет и лидерство беа пресудни за Лоренцо.
Тактички бедем со девет играчи за врска и моќниот Луис Дијаз
Најголемата сила на оваа Колумбија ќе доаѓа по крилните позиции и од средниот ред. Тимот е предводен од суперѕвездата на Баерн Минхен, Луис Дијаз, кој зад себе има фантастична сезона во Бундеслигата и Лигата на шампионите. Интересно е што селекторот Лоренцо на списокот повика дури девет класични фудбалери од средниот ред, со цел да има максимална контрола на теренот.
„На турнири како што е Светското првенство, од круцијално значење е да имате многу опции и ротација во средниот ред. Сакаме комплетно да ја покриеме таа зона и да имаме одговор за секое сценарио“, објасни Лоренцо.
Покрај Дијаз и Хамес, во тимот се враќа и искусниот поранешен голман на Арсенал, Давид Оспина, како и премиерлигашкиот тандем од Кристал Палас, Даниел Муњоз и Џеферсон Лерма.
Колумбија првиот дел од подготовките ќе го одработи во Богота, по што ќе одигра два пријателски натпревари против Костарика (1 јуни) и Јордан (7 јуни). Својот мундијалски пат во групата К го започнуваат на 17 јуни на стадионот во Мексико Сити против дебитантот Узбекистан, по што следуваат пресметките со ДР Конго и Португалија.
КОМПЛЕТНИОТ СОСТАВ НА КОЛУМБИЈА ЗА СП 2026:
Голмани: Камило Варгас (Атлас), Алваро Монтеро (Велез Сарсфилд), Давид Оспина (Атлетико Насионал).
Одбрана: Давинсон Санчез (Галатасарај), Џон Лукуми (Болоња), Јери Мина (Калјари), Вилер Дита ( Круз Азул), Даниел Муњоз (Кристал Палас), Сантијаго Аријас (Индепендиенте), Јохан Мохика (Мајорка), Деивер Мачадо (Нант).
Средина: Ричард Риос (Бенфика), Џеферсон Лерма (Кристал Палас), Кевин Кастањо (Ривер Плејт), Хуан Камило Портиља (Атлетико Паранаенсе), Густаво Пуерта (Расинг Сантандер), Џон Аријас (Палмеирас), Хорхе Караскал (Фламенго), Хуан Фернандо Кинтеро (Ривер Плејт), Хамес Родригез (Минесота Јунајтед), Хаминтон Кампаз (Росарио Сентрал).
Напад: Хуан Камило Хернандез (Реал Бетис), Луис Дијаз (Бајерн Минхен), Луис Суарез (Спортинг), Карлос Андрес Гомез (Васко де Гама), Џон Кордоба (Краснодар).
