Уште еден јануарски преоден рок во Премиер лигата е зад нас, а наместо вообичаените шокантни трансфери во последните минути, овојпат видовме нетипична тишина. Иако вкупниот трошок од 405 милиони фунти и понатаму е недостижен за останатите европски лиги, зад оваа бројка се крие нов тренд на претпазливост кај англиските гиганти.
Гигантите „стегнаа ремен“: Јунајтед, Челси и Арсенал без засилувања
Најголемото изненадување оваа зима е фактот што дури осум клубови завршија без ниту едно платено засилување за првиот тим. Во оваа група се најдоа гиганти како Манчестер Јунајтед, Челси и Њукасл. Слична е приказната и во Арсенал, кој потпиша само еден тинејџер за својата академија, додека Ливерпул одлучи нивната инвестиција од 55 милиони фунти (Жереми Жаке) да почека до јули.
Според податоците на „The Athletic“, јануарската потрошувачка сочинува едвај 13% од вкупниот сезонски буџет, кој летово урна рекорди со неверојатни 3,5 милијарди фунти.
Факторот „ПСР“ и страв од ризик
Главната причина за ваквото „седење мирно“ се строгите правила за профит и одржливост (PSR). По казните со одземање бодови за Евертон и Нотингем Форест минатите сезони, клубовите сфатија дека секое пречекорување на буџетот носи висока цена.
Агентите потврдуваат дека сопствениците на клубовите не го сакаат јануари. Проблемот е едноставен: во зима, продавачите ги диктираат цените бидејќи знаат дека купувачот е очаен. Освен тоа, периодот за адаптација на новиот играч е премногу краток, па додека тој да се вклопи, сезоната е веќе готова.
Кој трошеше? Само тие што „горат“
Додека големите мируваа, оние кои се борат за опстанок мораа да ризикуваат. Кристал Палас беше еден од најактивните, трошејќи 78 милиони фунти на Јорген Странд Ларсен и Бренан Џонсон, додека Вест Хем инвестираше 50 милиони во обид да избегне преселба во понизок ранг. Единствен исклучок од водечките беше Манчестер Сити, кој потроши 82 милиони фунти за да го освежи тимот кој полека ја губи доминацијата.
Јануари веќе не е пазар на кој се купуваат ѕвезди, туку „противпожарен апарат“ за тимовите во паника. Големите зделки и вистинскиот фудбалски пазар остануваат резервирани за летните денови, кога ризикот е помал, а изборот многу поголем.
