По две исцрпувачки средби во пет сета кои го задржаа на теренот неверојатни девет и пол часа во првите две кола, Александар Зверев конечно реши да ги скрати прекувремените часови на УС Опен. Германскиот тенисер забележа рутинска победа над 25-тиот носител, Чилеанецот Алехандро Табило со 3-0 во сетови (6-2, 7-6, 6-2) и обезбеди пласман во осминафиналето.
Брз старт и мала криза во вториот сет
Првиот сет под рефлекторите на стадионот „Артур Еш“ мина во апсолутна доминација на Зверев, кој за само 38 минути поведе со 1-0. Но, кога се чинеше дека Чилеанецот е пред целосен колапс со негатива од 4-2 во вториот сет, Зверев неочекувано го намали темпото, играше премногу пасивно и му дозволи на противникот да се врати во игра.
Табило не само што израмни, туку стигна и до две сет-топки. Сепак, шампионскиот карактер на Германецот пресуди кога беше најпотребно – тој ги спаси двете сет-топки, го одведе сетот во тај-брејк и убедливо го доби со 7-2.
Третиот сет беше само формалност. Зверев со два нови брејка рутински го затвори мечот за вкупно два часа и 26 минути, забележувајќи 44 винери наспроти 24 на Табило.
„Тренерот ми откри голема тајна“
Свесен за фактот дека во првите две кола мина вистински пекол, Зверев по мечот беше одлично расположен и не пропушти шанса да се пошегува на сопствена сметка и лошата подготовка.
„Вчера тренирав само еден час, што е навистина малку за мене, но со оглед на тоа што поминав над девет часа на теренот во два меча, морав некако да си го најдам ритамот. Мојот тренер ми кажа една интересна работа. Ми рече: ‘Само затоа што е меч во пет сета, не значи дека мораш да ги изиграш сите пет’. Искрено, не го знаев тоа до денеска, па тој совет навистина ми помогна,“ низ смеа изјави Зверев.
Тој ја искористи приликата и да ѝ се заблагодари на фантастичната публика во Њујорк, која дури и во доцните ноќни часови останува на трибините за да го бодри. Со овој триумф, германскиот ас испрати јасна порака до ривалите дека е свеж и подготвен за втората недела од турнирот.
