Додека техничките тимови во Нојбург и Хинвил деноноќно работат на болидот за 2026 година, комерцијалниот оддел на Ауди продолжува да ја пополнува сложувалката на партнери со звучни имиња. Германскиот гигант официјално потврди повеќегодишна соработка со светски познатиот бренд за лична нега, „Gillette“.
Ова партнерство означува враќање на американската компанија во Формула 1 по повеќе од една деценија пауза, но и обновување на врските со врвниот мотоспорт каде што Gillette имаше значително присуство во „златните 90-ти“.
Стратегија на „Сина крв“: Ауди бара глобални партнери
По склучувањето на договорот за насловно спонзорство со „Revolut“, Ауди јасно покажува дека цели кон соработка со етаблирани, глобално препознатливи брендови. Според најавите, логото на Gillette ќе биде видливо на болидот на Ауди, како и на тимската опрема, што претставува чекор напред во споредба со нивниот последен ангажман во спортот.
„Gillette е еден од најиконичните брендови во историјата на спортскиот маркетинг, со наследство изградено врз автентични врски со фановите ширум светот“, изјави Стефано Батистон, главен комерцијален директор на Ауди.
Договорот опфаќа и промоција на други брендови од портфолиото на компанијата, вклучувајќи ги Braun и Gillette Venus, со најава за креирање на специјализирани производи инспирирани од тимот.
🚨 Audi Revolut F1 Team announce @Gillette as an official partner.
— Inside Audi F1 (@InsideAudiF1) January 15, 2026
Gillette joins the project as Audi continue to build a strong commercial platform ahead of their Formula 1 debut. pic.twitter.com/07XRQlYjfs
Историски контекст: Од крилото на Бенетон до болидот на Ауди
За постарите познавачи на Формула 1, името Gillette буди носталгични спомени поврзани со екипата на Бенетон.
Ерата на Бенетон (1997): Највисокиот профил на брендот во спортот беше во доцните 90-ти. Логото на Gillette доминираше на задните крила на моделот B197, болид со кој Герхард Бергер ја извојува својата последна и емотивна победа на Германското ГП во Хокенхајм.
Маркетингот со Мекларен (2013-2014): Последното појавување на брендот беше преку соработка со Мекларен, но тоа беше првенствено маркетиншко партнерство фокусирано на азискиот пазар, а подоцна и на Европа. За разлика од договорот со Ауди, тогаш немаше логоа на болидот, туку возачите Џенсон Батон и Кевин Магнусен беа користени само за промотивни кампањи.
Лично спонзорство: Вреди да се напомене дека Gillette го поддржуваше и Бразилецот Бруно Сена (внукот на Аиртон Сена) за време на неговите настапи за Лотус и Вилијамс во 2011 и 2012 година.
Со влезот на Ауди во 2026 година, Формула 1 добива уште еден сериозен играч кој успева да ги привлече „заспаните“ гиганти назад во падокот, потврдувајќи ја растечката комерцијална вредност на шампионатот.
