Наместо големо славје пред домашната публика во Монца, екипата на Ферари доживеа вистински кошмар на Италијанското Гран При. Шарл Леклер ја заврши трката во заштитната ограда уште во вториот круг, додека Луис Хамилтон, по контроверзниот инцидент токму со својот тимски колега, успеа да стигне само до шесттата позиција.
Седумкратниот светски шампион не го криеше своето разочарување, отворено критикувајќи ја културата во тимот и недостатокот на јасни правила за тркање.
Инцидентот во првиот круг: Хамилтон остро му врати на Леклер
Трката тргна наопаку за Хамилтон уште во првите свиоци. Во обид да го претекне Леклер од внатрешната страна, Британецот беше истуркан во чакалот на излезот од вториот свиок, што го фрли на работ од топ 10 пласманот.
Откако Леклер по трката изјави дека одговорноста за инцидентот е заедничка и дека „двајцата отишле предалеку“, Хамилтон упати остар демант:
„Бев пред него во вториот свиок. До самото теме на свиокот, јас бев напред. Така што, нема никакво ‘ние’ во овој инцидент. Видете, јас не возам валкано. Секогаш сум се тркал чисто, фер и сум оставал простор за ривалот. Не сакам да го ставам тимот во опасност, но за другата страна ќе мора да зборувате со Фред (Васер)“.
„Во Мерцедес имавме правила, овде нема“
Британецот, кој моментно заостанува 76 бода зад лидерот во шампионатот Кими Антонели, смета дека Ферари мора да воведе строги „правила за борба“ на патеката доколку сака да нападне за титулата.
„Сè се сведува на правилата за борба. Кога бев во Мерцедес, имавме напишани правила за тоа како се тркаме меѓу себе. Понекогаш имаше искри со Нико Розберг, но најчесто функционираше одлично, особено со Валтери Ботас. Овде, нема никакви правила“, истакна разочараниот Хамилтон, додавајќи дека оперативните одлуки секогаш доаѓаат од самиот врв на тимот.
Промашена тактика и одговорот на Васер
Дополнителен удар за Хамилтон беше одлуката на тимот да не го повика во боксот за време на Виртуелното безбедносно возило (ВБВ) – стратешки потег кој перфектно го искористија Макс Верстапен и Кими Антонели. Хамилтон остана на патеката со стари пневматици, по што лесно беше претекнат од болидите со Мерцедес мотори и Мекларенот на Оскар Пијастри.
Тимскиот шеф Фред Васер се бранеше дека одлуката била донесена од страв Хамилтон да не заглави во сообраќајот зад Гасли и Цунода. Во врска со тимските наредби за шампионатот, Васер призна дека сега, по Монца, е вистинско време да се седне и да се донесе конечна одлука за тоа како ќе се одвива остатокот од сезоната.
