Иако фудбалскиот свет е поделен како ретко кога, Џани Инфантино нема намера да се повлече од претседателската функција во ФИФА. Светската куќа на фудбалот официјално потврди дека Швајцарецот ќе се кандидира за нов мандат на изборите во 2027 година, и покрај жестокото противење од страна на УЕФА и другите големи конфедерации.
Инфантино во моментов се наоѓа под огромен притисок откако доживеа целосно фијаско со проектот „ФИФА Форвард Ентерпрајз“ (ФФЕ).
Колапсот на планот за приватизација
Контроверзниот план на Инфантино предвидуваше продажба на малцински удел од комерцијалните права и операциите на ФИФА (вклучувајќи ги машките и женските Светски првенства) на приватни инвеститори, што предизвика вистински земјотрес.
УЕФА експресно се закани со бојкот на натпреварувањата на ФИФА, а набрзо кон критиките се приклучија и КОНКАКАФ и Азиската фудбалска конфедерација (АФЦ), кои изразија „сериозна загриженост“. Дури и јужноамериканскиот КОНМЕБОЛ порача дека фудбалот не смее да се стави во втор план поради комерцијални интереси.
Соочен со ваков бунт, Инфантино мораше да се повлече. Тој го откажа проектот, признавајќи дека истиот создал длабоки поделби, и вети дека ќе се обиде повторно да ги обедини сите инволвирани страни.
Правна војна со УЕФА и потенцијални противкандидати
Односите меѓу ФИФА и УЕФА се на историско најниско ниво. Европската куќа на фудбалот не крие дека сака да го види грбот на Инфантино и веќе поднесе неколку правни поднесоци пред судовите во САД со цел да изврши притисок врз него.
Од ФИФА, пак, остануваат глуви на овие барања. „Претседателот уште во април најави дека ќе бара реизбор во 2027 година. Ништо не е променето“, изјави портпаролот на организацијата. Крајниот рок за пријавување на противкандидати е 18 ноември, а како еден од најсериозните ривали на Инфантино се споменува претседателот на КОНКАКАФ, Виктор Монтаљани.
Скандал до скандал
Инфантино е на чело на ФИФА од 2016 година кога го наследи суспендираниот Сеп Блатер. Неговото владеење е проследено со низа контроверзии. Само оваа година, тој се соочи со лавина критики поради астрономските цени на билетите за Светското првенство, како и за скандалозното укинување на суспензијата на американскиот репрезентативец Фоларин Балогун, а поништувањето на казната дојде по директен телефонски повик од Доналд Трамп, со кого Инфантино негува блиски односи.
Врв на апсурдот беше одлуката на Инфантино да му ја додели инаугуралната „ФИФА награда за мир“ токму на Трамп, потег кој предизвика пријави до Етичкиот комитет за кршење на политичката неутралност на организацијата. На ова може да се додаде и неговиот неславен монолог „денес се чувствувам…“ пред Мундијалот во Катар во 2022 година, како и неуспешниот обид за ракување меѓу израелските и палестинските делегати на овогодинешниот конгрес.
