Керлингот е познат како „џентлменски спорт“, каде фер-плејот е пред сè, но на Олимписките игри во Кортина, тензиите ја достигнаа точката на вриење. Канада, велесилата во овој спорт, се најде во центарот на голем скандал откако нивната легенда Марк Кенеди беше обвинет за „мамење“ – и тоа двапати во два дена!
Она што требаше да биде рутински пат кон медалите за Канада, се претвори во дипломатска војна на мразот. Искусниот Марк Кенеди (44), освојувач на злато од 2010 година, се најде под жесток напад од противниците кои тврдат дека тој користи недозволени трикови за да ја коригира патеката на каменот.
„Двојно тапкање“ – трик или навика?
Контроверзијата започна на дуелот против Шведска, кога Оскар Ериксон го обвини Кенеди за т.н. „двојно тапкање“. Според Швеѓаните, Кенеди го пушта каменот навреме (сензорот свети зелено), но потоа со прстот му дава уште еден мал „поттик“ за да му ја поправи насоката или брзината.
ТВ снимките потврдија дека Кенеди навистина го допрел каменот по неговото ослободување, што доведе до хаос на теренот. Наместо извинување, Кенеди влезе во вербална пресметка со Ериксон, му порача „каде да си го напика тоа мислење“ и доби предупредување од судиите за користење недоличен речник.
🫣Scandal in the calmest sport in the world
— NEXTA (@nexta_tv) February 14, 2026
The Swedes accused Team Canada of cheating at the Olympics — and then it all kicked off… pic.twitter.com/oRx1taYDaQ
Истото сценарио и против Швајцарија
Ако првиот пат се сметаше за случајност, вториот пат веќе е шема. На саботниот меч, и Швајцарците го пријавија Кенеди за истиот прекршок.
„Го видов како го прави тоа додека судијата стоеше до мене. Не е фер, правилата мора да се почитуваат“, изјави Швајцарецот Пабло Лашат-Кушепен.
Дали е ова мамење или „мускулна меморија“?
Експертите се поделени. Додека некои сметаат дека ова е чист обид за манипулација, други, како британските натпреварувачи, сметаат дека е повеќе несвесна навика отколку активна намера за мамење. Сепак, правилата во керлингот се јасни: штом каменот ќе се пушти, секој следен допир со рака или четка значи дека каменот е „изгорен“ и мора да се отстрани.
Светската керлинг федерација одлучи да ангажира дополнителни судии кои ќе ги следат само рацете на играчите, што е преседан за овој спорт кој со децении се потпира на чесноста на самите играчи.
Канада останува еден од главните фаворити за медал, но сега врз нивната репутација има голем црн облак. Сите очи во Кортина сега се вперени во прстите на Марк Кенеди.
