Кристијано Роналдо и официјално влезе во светот на фудбалската сопственост. Преку неговата новоформирана компанија „CR7 Sports Investments“, легендарниот Португалец купи 25% од акциите на шпанскиот второлигаш Алмерија. Овој стратешки потег на Роналдо е дел од неговата долгорочна бизнис стратегија по завршувањето на активната кариера, враќајќи го во земјата каде што стана најдобар стрелец во историјата на Реал Мадрид.
Амбициозен проект со саудиски капитал
Алмерија во моментов е во сопственост на моќната саудиска групација „SMC Group“, предводена од Мохамед Ал-Кереиџи, кој важи за еден од најбогатите луѓе во арапскиот свет. Роналдо, кој веќе неколку години е главното лице на фудбалот во Саудиска Арабија, сега ги здружува силите со своите познаници за да го врати андалузискиот клуб во елитното друштво.
„Секогаш имав амбиција да придонесувам за фудбалот и надвор од теренот. УД Алмерија е клуб со цврсти темели и јасен потенцијал за раст. Возбуден сум што ќе работам со менаџерскиот тим за да ја поддржиме следната фаза од развојот на клубот“, изјави петкратниот освојувач на „Златната топка“.
Шокантна најава: Роналдо како играч-сопственик?
Алмерија во моментов се наоѓа на третото место во Сегунда Дивизија и е во сериозна трка за промоција во Ла Лига. Сепак, најголемата вест доаѓа од локалните медиуми во Андалузија. Весникот „La Voz de Almería“ пренесува дека претседателот Ал-Кереиџи има план кој ќе го „запали“ фудбалскиот свет – тој сака да го убеди Роналдо не само да инвестира, туку и да го облече дресот на Алмерија доколку клубот обезбеди пласман во првата лига.
Со оглед на неговото познавање на шпанскиот фудбал и неговата неверојатна физичка подготвеност, ваквото сценарио воопшто не изгледа невозможно.
Искуството на CR7 како клуч за успех
Претседателот на Алмерија не го криеше задоволството што успеал да го придобие Роналдо во својот борд на директори.
„Кристијано е најдобриот играч на сите времиња. Тој ја познава шпанската лига подобро од било кој друг и го разбира потенцијалот на она што го градиме тука, како во првиот тим, така и во нашата академија“, изјави Ал-Кереиџи.
Дали ова е само почеток на создавањето на новиот „кралски“ клуб во Шпанија под диригентската палка на CR7? Времето ќе покаже, но едно е сигурно – Алмерија веднаш стана најинтересниот клуб за следење во Шпанија.
