Македонското скијање го доживеа својот најсветол момент во историјата благодарение на неверојатната Јана Атанасовска. Нашата најдобра скијачка во изминатите неколку дена доминираше на патеките во Австрија и Италија, поставувајќи нови стандарди и рекорди кои досега биле незамисливи за македонскиот зимски спорт.
Јана не само што редеше победи, туку успеа да ги освои најдобрите ФИС поени во историјата на македонското скијање, и тоа гледано во двете конкуренции – и кај жените и кај мажите.
Доминација од Пампеаго до Хинтеррајт
Серијата историски резултати започна во италијанскиот центар Пампеаго на 16-ти март, каде Атанасовска го освои третотто место во слалом со одлични 30.66 ФИС поени. Но, тоа беше само загревање за она што следеше следниот ден, кога на истата патека Јана триумфираше со неверојатни 23.00 ФИС поени, најавувајќи дека е во животна форма.
Блескавите настапи продолжија денес во австрискиот Хинтеррајт. На двете одржани слалом трки, македонската претставничка беше едноставно недопирлива за конкуренцијата, освојувајќи две први места. На првата трка таа забележа 23.40 ФИС поени, додека на втората славеше со 26.45 поени. Овие бројки се потврда за нејзиниот огромен напредок и квалитет кој ја позиционира рамо до рамо со светската елита во оваа дисциплина.
Тимска работа и инспирација за идните генерации
Овој историски успех не е случаен, туку е плод на макотрпна работа и огромна посветеност. Покрај Јана, големи заслуги за овие резултати има и нејзиниот тренер, Александар Атанасовски – Чаве, чиј труд и стручност се вградени во секоја секунда предност на патеката.
Успехот на Атанасовска е силен сигнал за македонското скијање и огромна инспирација за сите млади спортисти во земјава. Со овие трки, Македонија не само што е присутна на скијачката мапа, туку почнува сериозно да пишува своја историја во зимските спортови.
