Едно од најжестоките и најстрасните дербија во светскиот фудбал, популарното „Тајн-Вир“ дерби помеѓу Њукасл Јунајтед и Сандерленд, е закажано за утре (недела, 13:00 часот) на култниот „Сент Џејмс Парк“. Ривалството помеѓу овие два клуба од североистокот на Англија е толку длабоко вкоренето што често ги дели не само градовите, туку и семејствата.
Токму таква е приказната на семејството Камингс од Каунти Дурам, кое ја сподели својата необична фудбалска реалност за BBC News.
„Момците се Џордис, девојките се Макемс“
Кирсти Камингс (40) е закоравен навивач на Сандерленд, љубов која ѝ ја пренел нејзиниот покоен татко. Таа е редовен посетител на „Стадионот на светлината“ и горда сопственичка на сезонски билет. Но, нејзиниот сопруг Стивен (37) е верен навивач на Њукасл.
„Се запознавме неделата пред Денот на вљубените. Кога излеговме на состанок, му реков: ‘Не можам да пијам многу, утре одам на натпревар’. Токму тогаш сфативме дека навиваме за лутите ривали. Искрено, не ми пречеше, тој е тоа што е,“ низ смеа раскажува Кирсти за BBC.
Ривалството во нивниот дом е јасно поделено. Стивен и нивниот четиригодишен син Исак се навивачи на Њукасл (Џорди), додека Кирсти и 11-годишната ќерка Оливија навиваат за Сандерленд (Макемс).
И покрај жестокото ривалство, семејството се труди работите да останат на шега.
„Кога Сандерленд ќе загуби, ќе влезам низ врата и тој ќе праша: ‘Кој беше резултатот денес, душо?’, а јас само му велам: ‘Замолчи, одам да спијам’,“ додава Кирсти, истакнувајќи дека најчесто таа е таа што повеќе го провоцира сопругот.
Влогот на теренот е огромен
Ова дерби доаѓа точно 10 години по последната пресметка меѓу овие два тима на „Сент Џејмс Парк“ во Премиер лигата.
Двете екипи влегуваат во 31-то коло речиси израмнети на табелата. Њукасл е на 11-тата позиција со 42 бода, додека Сандерленд е на 13-тото место со 40 бодови.
„Чавките“ ќе мора експресно да се рехабилитираат по болната елиминација во Лигата на шампионите и тешкиот пораз од Барселона (7:2) во средата. Од друга страна, Сандерленд, кој го доби првото овосезонско дерби на домашен терен (1:0), ќе бара излез од резултатската криза по трите последователни порази во сите натпреварувања.
Утре напладне, на североистокот на Англија ќе застане времето. А во домот на семејството Камингс, една половина ќе слави, додека другата ќе мора да ги трпи шегите до следното дерби.
