Пред почетокот на првенствениот натпревар помеѓу Бенфика и Виторија Гимараеш, култниот стадион „Да Луж“ занеме во едноминутно молчење. Ова беше емотивен поздрав за Силвино Лоуро, поранешниот голман и долгогодишен тренер на голмани, кој неодамна почина на 67-годишна возраст по долго боледување.
Но, за еден човек покрај аут-линијата, ова не беше само протоколарно молчење. Тренерот на Бенфика, Жозе Мурињо, не можеше да ги задржи солзите додека гледаше во фотографијата на својот голем пријател на големиот екран.
Речиси две децении неразделни
Силвино Лоуро не беше само дел од стручниот штаб на Мурињо, тој беше негова сенка и доверлив човек. Цели 18 години, Лоуро работеше рамо до рамо со „Специјалниот“, следејќи го од Порто, па низ авантурите во Челзи, Интер, Реал Мадрид и Манчестер Јунајтед. Под негово менторство, голмани како Витор Баија, Петр Чех и Жулио Сезар стигнаа до наградите за најдобри голмани на УЕФА.
„Поминавме 18 години заедно, тоа значи толку многу спомени. Да се живее со него значеше многу смеење, тој беше од оние луѓе кои лесно можеш да ги засакаш. Беше како дома со мојата сопруга, ќерка и син. Пред секој натпревар секогаш ми велеше: ‘Брате, сè ќе биде во ред денес’,“ изјави видно потресениот Мурињо по натпреварот.
O minuto de silêncio por Silvino. pic.twitter.com/N845kdB1n0
— SL Benfica (@SLBenfica) March 21, 2026
Силвино Лоуро имаше и богата играчка кариера. Како голман забележа 408 настапи во португалската Примеира лига играјќи за клубови како Виторија Сетубал, Виторија Гимараеш, Бенфика и Порто, а запиша и 23 настапи за репрезентацијата на Португалија.
Фудбалскиот свет изгуби голем професионалец, а Мурињо изгуби повеќе од соработник, изгуби вистински фудбалски брат.
