Вечерва во 20:00 часот, сите погледи на македонската фудбалска јавност ќе бидат вперени кон Битола. На реновираниот стадион „Петар Милошевски“, култното место под Тумбе Кафе, се игра најголемото и вечно македонско дерби помеѓу Пелистер и Вардар во рамките на 26-тото коло од Првата македонска фудбалска лига.
Од наша перспектива како љубители на фудбалот, искрено очекуваме и се надеваме на вистинско дерби, на реален фудбалски спектакл каков што и бара реномето на овие два најголеми клуба во Македонија. Овој натпревар има и дополнителна емотивна тежина бидејќи се игра во годината кога битолскиот клуб ја одбележува својата голема и јубилејна 80-годишнина од формирањето. Навивачите заслужуваат да видат некомпромисна борба, страст и фудбалска магија која ќе ја оправда долгогодишната традиција на ова ривалство.
Влогот на овој натпревар е огромен и за двете екипи. Вардар пристигнува во Битола како лидер на табелата со 61 бод и со јасна амбиција за победа во трката за шампионската титула, додека Пелистер со 25 бода очајнички бара бодови за опстанок во елитата. Тренерите Марјан Секуловски и Гоце Седлоски не криеја ништо и ги извадија своите најсилни адути на теренот. Кај скопските црвено-црни радува враќањето на Михаил Маневски во стартниот состав по неодамнешната операција.
Пелистер (4-2-3-1): Јовчевски; Бошковски, Грозданоски, Здравковиќ, Миленковски; Спировски, Крстевски; Србијанац, Ристовски, Булатовиќ; Ивановски.
Вардар (4-2-3-1): Талески; Јанкулов, Велковски, Матиќ, Маневски; Николов, Босанчиќ; Кастанеда, Данев, Торес; Омерагиќ.
Капитенот на Пелистер, Мирко Ивановски, најавува немилосрдна борба потенцирајќи дека најголемото македонско дерби е вистински празник за државата каде една грешка може да го реши победникот. Тој ги повика навивачите да бидат нивниот дванаесетти играч и да ги бодрат до последната секунда. Тренерот на битолчани, Марјан Секуловски, цврсто верува во своите момци и нагласува дека победата во Тетово ја вратила самодовербата кај играчите, но посочува дека поддршката од трибините ќе биде клучна токму во моментите кога работите нема да одат најдобро.
Останува да видиме дали Вардар ќе ја потврди шампионската класа или Пелистер пред полните трибини на реновираниот стадион ќе направи нов голем подвиг во годината на својот голем јубилеј. Главен судија на овој спектакл ќе биде Доне Ристовски од Гевгелија.
