Капитенот на Ливерпул, Вирџил ван Дајк, не го криеше разочарувањето по поразот од 2-0 против ПСЖ, но се обиде да остане фокусиран на она што следува. Холанѓанецот, кој несреќно учествуваше при првиот гол на домаќините кога топката се одби од него, призна дека тимот вложил огромен труд, но тоа не било доволно за позитивен резултат.
„Беше тешко. Очекувавме напорна работа и мислам дека добро се браневме со многу тела околу шеснаесеттникот. За жал, првиот гол беше несреќен одбиток. Имавме неколку мали моменти во контрите каде што можевме да реагираме подобро“, изјави Ван Дајк за TNT Sports.
И покрај негативата, столбот на одбраната на „Црвените“ веднаш ја насочи енергијата кон реваншот и густиот распоред во домашниот шампионат.
„Очигледно е дека воопшто не сум среќен што загубивме тука. Единствената позитивна работа е што имаме уште еден натпревар за играње следната недела на Енфилд. Но, сега мораме брзо да се опоравиме бидејќи Фулам веќе нè чека за неколку дена“, додаде капитенот.
Ливерпул викендов се враќа на премиерлигашките обврски, пред да се обиде да го приреди најавуваното „чудо на Енфилд“ против актуелниот европски првак во вторник.
