Бајката на Валентин Вашеро во неговиот роден град не само што продолжува, туку станува сè поневеројатна! По вчерашниот подвиг против Хуркач, тенисерот од Монако кој го смета овој клуб за свој втор дом, вечерва во уште еден трилер во три сета го совлада шестиот тенисер во светот, Алекс де Минор, со 6-4, 3-6, 6-3.
Со оваа победа, „челичниот“ Вашеро закажа полуфинална пресметка со бранителот на титулата и светски број еден, Карлос Алкараз. Монако сега има свој херој во полуфиналето заедно со трите најголеми имиња на денешницата: Алкараз, Синер и Зверев.
„Железни“ нозе и поддршка од 1.000 познати лица
Иако вчера играше речиси три часа против Хуркач, Вашеро покажа дека неговата физичка подготвеност е на ниво на врвните атлети. Против Де Минор, кој важи за еден од најбрзите и најборбените играчи на турнејата, Валентин успеа да го добие првиот сет по исцрпувачка размена од дури 23 удари.
Клучниот момент се случи во третиот сет при резултат 4-3 за Вашеро. Тој се соочи со 0-40 на свој сервис, но со неверојатна смиреност спаси четири брејк-топки и го сочува водството кое подоцна го претвори во победа.
„Огромна чест е да бидам дел од полуфиналето со тројца од најдобрите играчи во последните години. Едвај чекам утре да играм против Карлос во мојот роден град. Сите луѓе во ложите се мои најдобри пријатели од детството, со нив одев во основно и средно училиште. Можам да препознаам 1.000 лица во публиката. Пресреќен сум што имам ваков турнир во мојот клуб“, изјави пресреќниот Вашеро.
Making Monaco Proud 🇲🇨#RolexMonteCarloMasters pic.twitter.com/vX7y9xMCOn
— Rolex Monte-Carlo Masters (@ROLEXMCMASTERS) April 10, 2026
Спектакл во најава: Вашеро vs Алкараз
За Вашеро ова е остварување на сите сништа, но патот до финалето води преку Карлос Алкараз, кој денеска го прегази Бублик. Сепак, со поддршката на целиот стадион и формата во која се наоѓа, Вашеро покажа дека за него зборот „невозможно“ не постои.
Од понеделник тој веќе е дел од светската елита (Топ 20), но сега Монако сонува за нешто многу поголемо – домашна титула во Монте Карло!
