Сагата околу судењето во четвртфиналето на Лигата на шампионите меѓу Барселона и Атлетико Мадрид добива нова, институционална разрешница. ФК Барселона синоќа официјално потврди дека поднела формална жалба до УЕФА, изразувајќи го своето незадоволство од арбитражата на двата натпревари против мадридскиот тим.
Иако Каталонците веќе реагираа по првиот дуел, а нивните барања беа отфрлени од Нион, клубот овојпат смета дека акумулацијата на грешките низ целиот двомеч е премногу очигледна за да се премолчи.
„Неправилна примена на правилата и потфрлање на ВАР“
Во официјалното соопштение на клубот се наведува дека неколку клучни одлуки не биле во согласност со фудбалските правила. Барселона посебно го нагласува „недостатокот на соодветна интервенција од ВАР системот во инциденти од јасно значење“.
„Клубот смета дека акумулацијата на овие грешки имаше директно влијание врз текот на натпреварите и на конечниот исход на двомечот, предизвикувајќи значителна спортска и финансиска штета за ФК Барселона“, стои во соопштението.
Повеќе од само поплака – понуда за соработка
Барселона не сака само да ја „истури“ својата фрустрација. Клубот во дописот до УЕФА нуди и соработка за подобрување на судискиот систем во иднина. Целта на Каталонците е да се обезбеди „поригорозна, фер и транспарентна примена на правилата на играта“ за да се заштити интегритетот на најсилното европско натпреварување.
Прашањето е дали УЕФА овојпат ќе го смени својот став или Барселона повторно ќе наиде на затворена врата. Останува фактот дека елиминацијата од Атлетико Мадрид остави горчлив вкус на „Камп Ноу“, а раководството е решено правдата да ја бара до крај.
