Првиот човек на Фудбалската федерација на Македонија (ФФМ), Масар Омерагиќ, упати силна порака до јавноста по официјалниот состанок со претседателот на УЕФА, Александар Чеферин. Според Омерагиќ, присуството на највисоката делегација од Нион во „Куќата на фудбалот“ не е само протоколарно, туку е директна верификација на новиот курс по кој се движи македонскиот фудбал.
Омерагиќ ја искористи оваа прилика да го истакне напредокот во клучните сегменти кои беа приоритет во изминатата година, нагласувајќи дека патот кон успехот оди преку структурни промени и искрено пријателство со европската куќа на фудбалот.
„Потврда за нашето пријателство и напорна работа“
Во својата изјава, претседателот на ФФМ стави јасен акцент на сработеното во делот на реформите кои веќе почнаа да го менуваат ликот на федерацијата.
„Посетата на Александар Чеферин е вистинска потврда на нашето пријателство и искрениот однос што го имаме со раководството на УЕФА. За нас е особено важно што во изминатата година спроведовме сериозни реформи во повеќе сегменти – од структурни и организациски промени, преку подобрување на инфраструктурата, до јасна стратегија за развој на младинскиот фудбал“, истакна Омерагиќ.
Фудбал за сите: Од елитни натпреварувања до развој на базата
Омерагиќ изрази голема почит кон начинот на кој Чеферин управува со УЕФА, нагласувајќи дека токму таквиот модел на лидерство е пример што ФФМ сака да го следи на локално ниво.
„Чеферин се покажа како личност која е способна истовремено комерцијално да ги развива елитните натпреварувања, а истовремено да ја чува базата и да инвестира во развојот низ цела Европа. Горди сме на одличната соработка која ја имаме. Оваа поддршка и разбирање од УЕФА е силен поттик да продолжиме со реформите и да го развиваме македонскиот фудбал на највисоко можно ниво“, додаде првиот човек на македонскиот фудбал.
Работните состаноци во „Куќата на фудбалот“ продолжуваат со конкретизирање на идните проекти поддржани од фондовите на УЕФА, со посебен фокус на инфраструктурата низ цела Македонија.
