Во срцето на Мадрид, каде тишината по елиминацијата од Баерн Минхен во Лигата на шампионите е погласна од било кој аплауз, Алваро Арбелоа се обидува да го спаси она што остана од сезоната. Стратегот на „кралевите“ во неделата свика итен, непланиран состанок со целиот тим, обидувајќи се да воспостави ред во соблекувалната која се наоѓа на работ на целосен распад.
Капитенски збор во тешки времиња
Според извори блиски до клубот, Арбелоа инсистирал на максимален професионализам и посветеност до крајот на мај. На состанокот говорел и капитенот Дани Карвахал, чиј авторитет во моментов е можеби единствената алка што го држи тимот заедно. Зборовите на Карвахал имале посебна тежина, бидејќи тој е играч чиј договор истекува во јуни, а кој поради повреди одигра само 13 меча во Ла Лига оваа сезона.
Пораката е јасна: Реал не смее да дозволи сезоната да заврши со срам, иако титулата во Ла Лига е веќе далечен сон (9 бода зад Барселона на осум кола до крајот).
Арбелоа – Тренер со „рок на траење“
Иако неколку клучни играчи јавно му дадоа поддршка на Арбелоа, реалноста во Мадрид е сурова. Алваро, кој го замени Чаби Алонсо во јануари, најверојатно ќе биде отпуштен веднаш по завршувањето на сезоната. Иронијата е во тоа што тој донесе одредена свежина во соблекувалната, но Реал Мадрид е машина која се храни со трофеи, а оваа сезона витрините ќе останат празни.
Ова ќе биде втора последователна сезона без голем трофеј за Мадрид, нешто што не се случило цели 16 години. Под претседателство на Флорентино Перез, само Зинедин Зидан успеал да преживее сезона без титула. Арбелоа, со епското испаѓање од второлигашот Албасете во Купот, тешко дека ќе биде вториот.
„Недопирливите“ и заштитата на ѕвездите
Додека се бара четвртиот тренер во две години (се споменуваат Клоп, Покетино, па дури и враќање на Зидан), Управата веќе ја повлече линијата. Според информациите на „Марка“, клубот ги прогласи за „недопирливи“ најголемите ѕвезди: Мбапе, Винисиус, Белингам и Валверде се темелот околу кој ќе се гради иднината и за нив нема да се слушаат понуди. На оваа листа се и помладите како Ѓулер, Брахим Диаз и Трент, кои се сметаат за иднината на клубот.
Цехот за неуспехот ќе го платат играчите од „вториот ешалон“. Клубот планира чистка на оние кои речиси и не учествуваа во поразите, сè со цел да се заштити маркетиншкиот потенцијал на главните ѕвезди, кои иако не трчаат доволно на теренот, носат милиони надвор од него.
Духот на „неуспешните Галактикоси“ се враќа?
Паралелата со ерата на првите „Галактикоси“ од 2006 година е застрашувачка. Реал Мадрид во моментов изгледа како тим на некомпатибилни ѕвезди кои играат „на сила“. Споредбата меѓу првите две сезони на Мбапе со оние на Кристијано Роналдо веќе не оди во корист на Французинот. Во 2011-та, Реал падна во ЛШ со борба; денес, Реал е на -10 зад Барселона која доминира со деца како Ламин Јамал.
Прашањето кое си го поставуваат навивачите е: Дали најавената „чистка“ летово ќе биде само маска за фијаското во позадина? Третата сезона (2026/27) ќе биде елиминациска за сите – од играчите до Управата. Ако во август не видиме инстант резултати и фантастична игра, Мадрид го чека вистински „пекол“.
