Продолжуваме со нашиот серијал посветен на 16-те стадиони домаќини на Светското првенство во 2026 година. Патуваме во Тексас, на местото каде што сè е поголемо – од екраните до амбициите. Добредојдовте на стадионот во Арлингтон, домот на Далас Каубојс, кој за потребите на Мундијалот ќе стане еден од најважните центри на светскиот фудбал.
„Џери Ворлд“: Игралиштето од 1,2 милијарди долари
Стадионот на Далас Каубојс, попознат како „AT&T Stadium“, е архитектонско чудо кое локалното население често го нарекува „Jerry World“, по ексцентричниот сопственик на Каубојс, Џери Џонс. Изграден со визија да биде најмодерниот спортски објект во Америка, неговата изградба чинеше неверојатни 1,2 милијарди долари, сума која беше двојно поголема од првичните проценки.
Овој стадион е вистински гигант. Со површина од преку 270.000 квадратни метри, тој е толку голем што во него (со затворен покрив) би можела да ja собере целата Статуа на слободата заедно со нејзиниот подножен дел. За време на Мундијалот, според строгите правила на ФИФА, тој официјално ќе го носи името „Dallas Stadium“.
Капацитет и рекорди
Иако за НФЛ натпреварите капацитетот е околу 80.000 седишта, стадионот е дизајниран да биде флексибилен. Во минатото, за специјални настани како НБА „Ол-стар“ натпреварот во 2010 година, тука се собраа рекордни 108.713 гледачи, со што беше соборен светскиот рекорд за посетеност на еден кошаркарски меч.
За Светското првенство во 2026 година, ФИФА го одреди капацитетот на 70.122 седишта, со можност за мали корекции во зависност од финалната конфигурација за медиумите и ВИП зоните.
Инженерски предизвик: Трева која „патува“ од Колорадо
Најголемиот предизвик за менаџментот на стадионот е подлогата. Каубојс играат на вештачка трева, но ФИФА бара исклучиво природна подлога. За таа цел, инсталиран е специјален систем за иригација, а тревата се одгледува на посебна фарма во Колорадо (стотици километри подалеку) и ќе биде транспортирана со камиони-ладилници непосредно пред турнирот.
Поради ширината на фудбалските терени, нивото на подлогата ќе биде подигнато за околу 71 сантиметар, а делови од луксузните апартмани покрај аут-линијата ќе бидат привремено отстранети за да се задоволат димензиите на ФИФА.
Искуство за навивачите: 4К спектакл на небото
Дури и ако седите во најдалечниот ред, нема да пропуштите ниту еден детаљ. Над центарот на теренот виси огромниот четиристран видео-бим, кој неодамна беше надграден со 4К монитори. Овој екран е заштитен знак на стадионот и нуди кристално јасна слика дури и за оние на кои погледот кон теренот им е делумно попречен.
Логистика и клима
Тексас во јуни и јули е пеколно жесток и влажен, со температури кои достигнуваат до 36°C. Сепак, навивачите немаат причина за грижа. Стадионот го поседува најголемиот подвижен покрив во светот и моќен систем за климатизација. За време на целиот Мундијал, покривот ќе остане затворен, обезбедувајќи пријатна температура за играчите и гледачите.
Што се однесува до превозот, плановите вклучуваат засилување на „Trinity Railway Express“ возовите од центарот на Далас до стадионот, со дополнителни автобуски линии кои ќе ги превезуваат навивачите до влезовите.
Распоред на натпревари во Далас:
Далас ќе биде епицентарот на фудбалот со дури девет натпревари, вклучувајќи две средби на Аргентина и првото полуфинале:
- 14 јуни: Холандија против Јапонија (Група Ф)
- 17 јуни: Англија против Хрватска (Група Л)
- 22 јуни: Аргентина против Австрија (Група Ј)
- 25 јуни: Јапонија против (квалификант)
- 27 јуни: Јордан против Аргентина (Група Ј)
- 30 јуни: Шеснаесетфинале
- 3 јули: Шеснаесетфинале
- 6 јули: Осминафинале
- 14 јули: Полуфинале (Прв натпревар)
Прочитајте ги и другите делови од нашиот серијал „Водич низ мундијалските стадиони“:
