Во таборот на Арсенал владее големо разочарување по првиот полуфинален натпревар против Атлетико Мадрид (1-1), но не поради резултатот, туку поради контроверзните судиски одлуки. Менаџерот на „топџиите“, Микел Артета, беше исклучително остар во својата критика кон судијата Дани Макели и употребата на ВАР технологијата.
Артета „грми“ по Мадрид: Ова е неприфатливо и го менува текот на двомечот!
Иако Арсенал си замина со реми од „Метрополитано“, главна тема по натпреварот е поништениот пенал над Еберечи Езе во 78-мата минута. Иако првично покажа на белата точка по контактот на Давид Ханцко врз Езе, судијата Макели по консултација со ВАР и прегледување на снимката ја промени својата одлука.
Артета не го криеше својот бес по завршувањето на средбата, нагласувајќи дека вакви грешки не смеат да се случуваат на ова ниво на натпреварување.
„Гледајќи ја снимката во соблекувалната, можам да кажам дека одлуката да се поништи пеналот е целосно неприфатлива. Тоа е против правилата и не го разбирам. Ова целосно го менува текот на овој двомеч“, изјави Артета.
Шпанскиот стратег смета дека штом постои јасен контакт, одлуката не треба да се преиспитува толку долго. „Не можете да ја поништите одлуката откако ќе ја гледате снимката 13 пати. На ова ниво, тоа е недозволиво“, додаде тој.
Притисок од трибините и од Симеоне
Атмосферата на стадионот стана вжештена за време на ВАР проверката, а Диего Симеоне беше забележан во непосредна близина на мониторот, гестикулирајќи кон судијата да ја промени одлуката. Артета не сакаше директно да го обвини притисокот од толпата, но подвлече дека одлуката е дефинитивно погрешна.
Интересно е што Артета немаше забелешки за пеналот досуден за Атлетико по играњето со рака на Бен Вајт, признавајќи дека судиите се конзистентни со тоа правило. Од друга страна, Симеоне пак го доведе во прашање првиот пенал за Арсенал, тврдејќи дека Ѓокереш само го чекал контактот за да падне.
