Барселона е на само два бода до потврда на втората последователна титула во Ла Лига, откако во тежок натпревар славеше на гостувањето кај Осасуна со 2:1. Со овој триумф, избраниците на Ханси Флик ја зголемија предноста на врвот на табелата на огромни 14 бодови во однос на Реал Мадрид.
Титулата за „каталонците“ може да биде математички потврдена уште утре (недела), доколку Реал Мадрид не успее да победи на гостувањето кај Еспањол. Во случај „кралевите“ да триумфираат, Барселона ќе ја има првата следна шанса да го завери пехарот на домашен терен токму против најголемиот ривал во „Ел Класико“ на 10 мај, каде ќе им биде доволно дури и реми.
Резервистите го скршија отпорот на „Ел Садар“
Натпреварот во Памплона беше изедначен и без голови сè додека Ханси Флик не повлече клучни потези од клупата. Првото полувреме помина во доминација на гостите во посед на топката, но Осасуна беше тимот кој ги имаше посериозните шанси преку Анте Будимир, кој ја погоди стативата и го принуди голманот Жоан Гарсија на врвна интервенција.
Промената на резултатот пристигна во вториот дел кога резервистот Маркус Рашфорд испрати прецизен центаршут кој на вистинското место го пронајде Роберт Левандовски, а полскиот напаѓач со глава ја смести топката во мрежата за 1:0.
Само пет минути подоцна, уште еден играч кој влезе од клупата го потврди триумфот. Фермин Лопез испрати одлично додавање низ одбраната на домашните, а Феран Торес ладнокрвно го совлада голманот Серхио Херера за зголемување на предноста.
Драматичен финиш
Осасуна не се предаде и брзо се врати во игра кога Раул Гарсија со глава го реализираше центаршутот на Абел Бретонес. Домаќините извршија силен притисок во последните минути, дури и голманот Херера се приклучи во нападот при прекините, но Барселона успеа да издржи и да ја забележи својата 10-та последователна победа во првенството.
