Барселона е на врвот на шпанскиот фудбал! Со величествена победа над вечниот ривал Реал Мадрид од 2-0, избраниците на Ханси Флик и официјално ја обезбедија својата 29-та титула во Ла Лига на три кола пред крајот на сезоната. Сцената на преуредениот „Ноу Камп“ беше подготвена за спектакл, а „каталонците“ не разочараа, потврдувајќи ја својата доминација со 11-та последователна победа во првенството.
Натпреварот започна во знакот на Маркус Рашфорд. Англискиот напаѓач, кој игра како позајмен играч од Манчестер Јунајтед, уште во раната фаза ги полуде навивачите со спектакуларен гол од слободен удар. Иако Тибо Куртоа ја допре топката, неговиот удар беше премногу силен и прецизен, завршувајќи во самиот агол за 1-0.
Еуфоријата продолжи во 18-та минута по една прекрасна тимска акција – Дани Олмо мајсторски го проигра Феран Торес, кој со рутинска завршница ја дуплираше предноста.
Емоции за Флик и челична одбрана на „Ноу Камп“
Овој триумф имаше посебна емотивна тежина. И Рашфорд и Торес по своите погодоци потрчаа во прегратка на Ханси Флик, во знак на поддршка по смртта на неговиот татко викендов. Барселона на теренот изгледаше како совршена машина, остварувајќи ја својата 18-та победа од исто толку натпревари пред домашната публика оваа сезона – учинок кој е клучниот столб на новата титула.
Реал Мадрид, под водство на Алваро Арбелоа, делуваше немоќно и дефокусирано. Проблемите во соблекувалната на „кралевите“ излегоа на површина по физичката пресметка меѓу Чуамени и Валверде пред натпреварот, поради која Уругваецот заврши со потрес на мозокот и го пропушти дербито.
Иако Винисиус Жуниор се обиде да ја врати надежта во вториот дел, младиот голман Жоан Гарсија уште еднаш беше на висина на задачата, спречувајќи секаква неизвесност. Со оваа победа, Барса сега има недостижни 14 бода предност пред Мадрид и гордо ја слави својата втора последователна круна.
