Додека Арсенал ја води најжестоката битка за титулата во последните две децении, една индивидуална награда веќе е сигурно во рацете на нивниот чувар на мрежата. Давид Раја и официјално е добитник на наградата „Златна ракавица“ за сезоната 2025/26, што за шпанскиот голман е трето вакво признание по ред!
Со вкупно 18 натпревари без примен гол на 36 одиграни средби, Раја е недостижен на врвот на листата на голмани во Премиер лигата. Неговиот најблизок следбеник, Џанлуиџи Донарума од Манчестер Сити, има 14 „чисти мрежи“, што значи дека дури и со три преостанати натпревари до крајот, италијанскиот репрезентативец не може да го стигне Шпанецот.
Во друштво на великаните
Овој успех го става Раја во многу елитно друштво. Тој стана само четвртиот голман во историјата на Премиер лигата кој успеал да ја освои оваа награда трипати по ред. Пред него, тоа им пошло од рака само на Пепе Реина (Ливерпул), Џо Харт (Манчестер Сити) и Едерсон (Манчестер Сити).
Статистика за „Златната ракавица“ 2025/26:
| Голман | Клуб | Чисти мрежи |
| Давид Раја | Арсенал | 18 |
| Џанлуиџи Донарума | Манчестер Сити | 14 |
| Џордан Пикфорд | Евертон | 11 |
| Дин Хендерсон | Кристал Палас | 11 |
| Ѓорѓе Петровиќ | Борнмут | 10 |
Господарот на шеснаесеттникот
Откако пристигна во Арсенал од Брентфорд во 2023 година, Раја не знае за ништо друго освен за „Златна ракавица“. Во својата прва сезона имаше 16 мечеви без примен гол, минатата сезона ја подели наградата со Матц Селс (13), а оваа сезона доминира со досегашни 18.
Сега Раја е на само еден чекор до израмнување на рекордот од четири награди, кој заеднички го држат легендата на Арсенал, Петр Чех и Џо Харт. Со оглед на формата во која се наоѓа, не би било изненадување ако следната сезона Шпанецот стане најуспешниот голман во историјата на ова признание.
