Актелниот МотоГП шампион, Марк Маркез, вчера помина низ две успешни хируршки интервенции во болницата „Ruber Internacional“ во Мадрид. По тешкиот пад за време на спринт трката за Големата награда на Франција, возачот на Ducati Lenovo Team веднаш се врати во Шпанија за итна медицинска помош.
Медицинскиот тим, предводен од д-р Самуел Антуња, изврши две различни процедури за да ги санира новите и старите повреди на шпанскиот ас.
Санирана фрактура на стапалото по падот во Ле Ман
Првата операција беше насочена кон стабилизација на фрактурата на петтата метатарзална коска на десното стапало. Оваа повреда Маркез ја заработи вчера, по „highside“ падот во финишот на спринт трката во Ле Ман. Лекарите успешно ја фиксираа коската, со што беше отстранета непосредната опасност од понатамошни компликации.
AN ABSOLUTELY MASSIVE CRASH for @marcmarquez93 💥
— MotoGP™🏁 (@MotoGP) May 9, 2026
Thankfully he’s up on his feet #FrenchGP 🇫🇷 pic.twitter.com/gyPcleGMFZ
Втора интервенција за хроничниот проблем со рамото
Паралелно со првата операција, лекарите извршија и претходно планирана корекција на десното рамо. Овој зафат беше неопходен за да се отстранат две завртки и фрагмент од коска од претходна операција извршена во 2019 година. Овие делови се поместиле по минатогодишниот пад во Индонезија и почнале да вршат притисок врз радијалниот нерв, предизвикувајќи му на Маркез силни болки по трките во Херез и Ле Ман.
Иако оваа операција првично беше планирана за паузата по трката во Каталонија, падот во Франција ги принуди лекарите и возачот да го забрзаат процесот.
Процес на рехабилитација и неизвесно враќање
Маркез веќе е официјално отпишан за трката за ГН на Каталонија следната недела. Тој утре ќе биде отпуштен од болница на домашно лекување, каде што веднаш ќе го започне процесот на рехабилитација.
„Операцијата помина успешно! Навистина сум благодарен за вашите пораки и поддршка. Посебна благодарност до медицинскиот тим за нивната неверојатна работа“, порача Маркез преку социјалните мрежи.
Учеството на Маркез на трката за ГН на Италија, закажана за 31 мај, останува неизвесно и ќе зависи од брзината на неговото закрепнување во следните две недели.
