Продолжуваме со нашиот серијал посветен на стадионите домаќини на Светското првенство во 2026 година. Патуваме во „Смарагдниот град“ – градот на кафе-културата, познатата игла „Space Needle“ и еден од најстраствените фудбалски центри во САД. Добредојдовте во Сиетл, на стадионот кој важи за најгласен во Северна Америка.
Храмот на звукот: Погласно од млазен авион
Додека многу стадиони во САД се градени примарно за рагби, а потоа прилагодени за како што би го нарекле тие „сокер“, стадионот во Сиетл уште од самиот почеток (2002 година) беше дизајниран со визија да ги гостоприми двата спорта. Тоа му помогна на овој град да стане еден од најсилните фудбалски пазари во Америка, каде екипата на „Сиетл Саундерс“, каде игра и македонскиот репрезентативец Дени Мусовски, редовно урива рекорди на посетеност.
Сепак, она по што овој објект е светски познат е неговата акустика. Во 2013 година, стадионот постави Гинисов рекорд за најгласен стадион на отворено во светот, со бучава од неверојатни 137,6 децибели – звук што е еднаков на полетување на млазен мотор. Енергијата тука е толку интензивна што за време на концертите на Металика и Ролинг Стоунс и големите победи на НФЛ тимот Сихокс, сеизмографите во близина регистрираа реална сеизмичка активност, феномен познат меѓу локалците како „BeastQuake“.
Како ќе се вика и кој е сопственикот?
Стадионот денес е препознатлив под името „Lumen Field“, по договорот за именување со телекомуникацискиот гигант „Lumen Technologies“. Сепак, како и кај останатите американски домаќини, строгите правила на ФИФА против корпоративно брендирање ќе го претворат во едноставниот, но симболичен „Стадион Сиетл“ за време на Мундијалот.
Изграден во 2002 година со инвестиција од 430 милиони долари, овој објект е вистински мултифункционален центар на Пацифичкиот северозапад. Тој е во јавна сопственост на државното тело „Washington State Public Stadium Authority“, но неговото срце им припаѓа на трите големи франшизи кои го делат теренот: НФЛ тимот Сиетл Сихокс, фудбалскиот бренд Сиетл Саундерс од МЛС и женската екипа Сиетл Рејн. Оваа соработка меѓу „америчкиот“ и европскиот фудбал го направи стадионот еден од најуспешните модели за спортски соживот во САД.
Инженерски предизвик: Природна трева над вештачката
Најголемиот логистички тест за организаторите во Сиетл ќе биде подлогата. Додека „Сиетл Стадион“ вообичаено е дом на модерната вештачка трева „FieldTurf“, која е идеална за издржување на густиот распоред на НФЛ и МЛС сезоните, ФИФА наложува исклучиво природна трева за натпреварите од Светското првенство.
Ова значи дека врз постоечката база ќе биде инсталиран привремен систем со вистинска трева, што е исклучително сложена операција. За подлогата да остане зелена и здрава во текот на целиот турнир, инженерите мораат да направат специјални модификации во системите за иригација и вентилација под теренот. Бидејќи стадионот е делумно затворен, ќе се користи и технологија за вештачко сончево зрачење за тревата да го задржи својот квалитет под огромната сенка на трибините.
Искуство за навивачите: Поглед кон небото на Сиетл
Она што го издвојува овој стадион од сите други во Америка е неговиот специфичен дизајн во форма на потковица. Додека повеќето стадиони се целосно затворени бетонски школки, „Сиетл Стадион“ има отворен северен крај. Оваа архитектонска одлука им овозможува на навивачите кои седат на јужната трибина да уживаат во спектакуларен поглед кон облакодерите во центарот на градот, создавајќи чувство дека стадионот е органски дел од урбаното јадро.
За време на Мундијалот, капацитетот ќе биде околу 69.000 седишта, а навивачите ќе можат да уживаат и во модернизирана инфраструктура. Како дел од подготовките, стадионот ги заменува старите клупи со нови седишта со потпирачи, го надградува Wi-Fi системот и ги проширува зоните за храна и пијалаци, каде акцентот ќе биде ставен на познатите локални специјалитети и крафт пива по кои Сиетл е препознатлив ширум светот.
Атмосфера и клима
Сиетл е познат по постојаниот дожд, но јуни и јули во овој дел од Пацификот се изненадувачки пријатни и суви. Температурите ќе се движат околу 22°C, што е идеално за фудбал. Стадионот е на отворено, а специфичниот делумен покрив е дизајниран да ја одбива и засилува бучавата назад кон теренот, создавајќи „пекол“ за противничките екипи.
Распоред на натпревари во Сиетл:
Сиетл ќе биде домаќин на шест мундијалски средби, вклучувајќи и еден натпревар на домашната селекција на САД:
- 15 јуни: Белгија против Египет (Група Г)
- 19 јуни: САД против Австралија (Група Д)
- 24 јуни: Квалификант од УЕФА против Катар (Група Б)
- 26 јуни: Египет против Иран (Група Г)
- 1 јули: Шеснаесетфинале (Натпревар 82)
- 6 јули: Осминафинале (Натпревар 94)
Прочитајте ги и другите делови од нашиот серијал „Водич низ мундијалските стадиони“:
