Премиерлигашкиот статус на Вест Хем виси на тенок конец по катастрофалниот пораз на гостувањето кај Њукасл Јунајтед со 3-1. Избраниците на Нуно Еспирито Санто имаа златна шанса со триумф на северот конечно да излезат од опасната зона, но наместо тоа, самите си ја потпишаа капитулацијата и сега се наоѓаат пред раб на амбисот наречен Чампионшип.
Поради очајната гол-разлика, „чеканите“ веќе не зависат сами од себе. Во вторник навечер тие ќе мора со сите сили да навиваат за Челси во дербито против Тотенхем, бидејќи тоа е единствениот начин за Вест Хем да ги задржи теоретските шанси за спас во последното коло од Премиер лигата.
„Чеканите“ сами се нокаутираа на „Сент Џејмс Парк“
Гостите беа архитекти на сопствениот дебакл уште во првите 25 минути од натпреварот. Првиот шок пристигна по кардиналната грешка на голманот Мадс Хермансен. Неговото пресилно додавање кон дефанзивецот Жан-Клер Тодибо експресно го пресретна Харви Барнс, кој веднаш се нафрли во шеснаесеттникот и идеално го пронајде Ник Волтемаде за почетни 1-0.
Само четири минути подоцна, одбраната на Вест Хем повторно капитулираше. Џејкоб Ремзи со хируршки прецизен пас го исфрли во простор Вилијам Осула, а данскиот напаѓач ладнокрвно ја смести топката меѓу нозете на Хермансен за огромни 2-0, оставајќи го Нуно Еспирито Санто со наведната глава на клупата.
Во вториот дел, „страчките“ ставија точка на мечот. Разиграниот Осула, кој се наоѓа во животна форма со дури шест гола на последните седум меча, перфектно искомбинира со Џо Вилок и со својот втор погодок на мечот зголеми на недостижни 3-0. До крајот, резервистот Валентин Кастелјанос со фантастичен удар од далечина постигна деби-гол за ублажување на поразот на Вест Хем, но тоа беше премалку за каков било подлабок камбек.
Солзи на навивачите: Спектакуларно збогување со легендата Киран Трипиер
Додека на едниот крај се тажеше, на другиот имаше силни емоции и почит кон минатото. Навивачката група „Wor Flags“ приреди спектакуларен декор на трибините со порака: „Засекогаш легенда на Њукасл. Фала ти за спомените“, испраќајќи ги во култна пензија долгогодишните дефанзивци Киран Трипиер и Емил Крафт, кои си заминуваат по истекот на договорите.
Tripps. Forever a Newcastle United Legend. 🖤🤍 pic.twitter.com/2TGwscnUix
— Newcastle United (@NUFC) May 17, 2026
Трипиер во 2022 година направи нестварен потег кога играњето во Лигата на шампионите со Атлетико Мадрид го замени за жестока битка за опстанок со Њукасл, со што засекогаш го заслужи статусот на трансфер-икона која ја смени историјата на клубот. Од друга страна, менаџерот Еди Хау ја слави победата бидејќи во младиот Осула изгледа конечно го пронајде лекот за нападот по болното заминување на Исак во Ливерпул.
За Вест Хем, ситуацијата е алармантна. Бесните навивачи со жестоки свирежи и скандирања „Не сте вредни да го носите овој дрес“ ги испратија своите фудбалери по третиот последователен лигашки пораз. Задачата за Нуно изгледа како невозможна мисија: покрај победа над разиграниот Лидс во последното коло, Вест Хем ќе мора да се моли за два порази на Тотенхем до крајот на неделата.
