Брутален скандал ја потресе англиската фудбалска јавност откако Саутемптон и официјално беше дисквалификуван и исфрлен од плејофот во Чемпионшип. „Светците“ беа притиснати до ѕид и мораа да признаат дека во текот на сезоната систематски шпионирале затворени тренинзи на три противнички екипи.
Оваа шокантна одлука на независната комисија на ЕФЛ донесе епски пресврт – Мидлсбро, кој претходно беше елиминиран од Саутемптон во полуфиналето, експресно е вратен во игра! Тимот на Мидлсбро в сабота на легендарниот „Вембли“ ќе се соочи со Хал Сити во финалниот меч за пласман во Премиер лигата – дуел кој во фудбалскиот свет е познат како најскапиот натпревар, вреден минимум 110 милиони фунти. Како дополнителна казна, на Саутемптон му се одземени и четири бода за следната сезона.
Филмско апсење: Како падна шпионот со мобилен телефон?
Самата акција на шпионирање изгледа како сцена од лош акционен филм. На 7 мај, пред првиот полуфинален дуел, практикантот-аналитичар на Саутемптон, Вилијам Салт, бил забележан како се крие во грмушките во близина на тренинг базата на Мидлсбро. Тој го паркирал автомобилот кај блискиот голф-клуб, пешачел до еден рид и со својот мобилен телефон во живо го пренесувал тајниот тактички тренинг на противникот.
Кога еден од вработените во Мидлсбро му се приближил, Салт одбил да се идентификува, панично избришал дел од содржината на телефонот и побегнал во тоалетите на голф-клубот каде што експресно ги променил алиштата за да го изгуби трагот. Сепак, клупскиот фотограф на Мидлсбро успеал да го слика, по што неговиот лик бил идентификуван на официјалниот сајт на Саутемптон, а доказите веднаш биле испратени до дисциплинските органи.
Систематско мамење кое не донесе никаков резултат
Истрагата брзо покажа дека ова не бил изолиран инцидент на „светците“. Саутемптон призна вина за нелегално снимање на тренинзи на уште два клуба – Оксфорд Јунајтед (во декември 2025 година) и Ипсвич Таун (во април 2026 година). Иронијата да биде уште поголема, Саутемптон не победи на ниту еден од овие три натпревари на кои користеше шпиони (загуби од Оксфорд, а ремизираше со Ипсвич и Мидлсбро).
Раководството на Саутемптон најави дека веднаш во тек на денешниот ден (среда) ќе поднесе итна жалба до Независниот арбитражен панел со образложение дека казната е престрога и не е пропорционална. ЕФЛ вети дека процесот ќе биде решен експресно брзо уште денес за да нема одложување на големото саботно финале, додека Саутемптон веќе започна со процесот на рефундирање на парите за илјадниците навивачи кои веќе купија карти за „Вембли“.
