Чекањето долго 22 години конечно заврши. Арсенал е нов шампион на Англија, оставајќи ги зад себе трите последователни разочарувања со второто место на табелата. Тимот на Микел Артета издржа сè и го собори Манчестер Сити од тронот.
Реномираниот медиум „Би-Би-Си Спорт“ (BBC Sport) направи детална анализа за клучните моменти во сезоната кои ги претворија „топчиите“ од вечни губитници во суверени владетели на Премиер лигата.
1. Пеколното лето во кое беа потрошени 250 милиони фунти
Поучени од минатогодишната лекција на Ливерпул кој прошета до титулата благодарение на долгата клупа, Арсенал реши брутално да пазари. Клубот инвестираше над 250 милиони фунти во осум нови фудбалери. Прва ѕвезда беше шведскиот голгетер Виктор Ѓокереш, кој пристигна од Спортинг за 64 милиони фунти и конечно им ја донесе на навивачите посакуваната „деветка“.
Покрај него, средниот ред беше зацементиран со Мартин Зубименди, одбраната засилена со Пјеро Хинкапие, а лондонскиот шмек во нападот го донесоа Нони Мадуеке и Еберечи Езе. Како што одминуваше времето, секоја потрошена фунта се покажа како чист погодок.
2. Проектилот на Мартинели во 93-та минута против Сити
Иако се случи во рамките на само петтото коло во септември, овој момент имаше тежина на титула. Манчестер Сити водеше со раниот гол на Ерлинг Халанд, а Пеп Гвардиола во второто полувреме се затвори со петмина во одбрана, сигурен дека ќе ги однесе трите бода од „Емирати“.
Но, во судиското продолжение, новата ширина на Арсенал стапи на сцена. Резервистот Езе фантастично асистираше, а Габриел Мартинели во 93-та минута погоди за 1:1, правејќи огромен психолошки пресврт во шампионската трка.
A sprinkling of Martinelli magic 🪄 pic.twitter.com/axDMaheyYB
— Arsenal (@Arsenal) April 18, 2026
3. Нестварниот камбек на „Сент Џејмс Парк“ во 96-та минута
Гостувањата кај Њукасл беа вистински кошмар за Артета во изминатите години (три порази без постигнат гол). Кога Волтемаде ги донесе „страчките“ во водство во првото полувреме, навивачите на Арсенал го очекуваа најлошото, особено по еден поништен пенал од страна на ВАР. Сепак, Микел Мерино израмни во 84-та минута, а во 96-та минута Габриел со глава по корнер донесе нестварна победа од 2:1 за тотален делириум на клупата.
4. Првиот хет-трик на Езе за шест бода предност над ривалите
Во ноември, пред големото дерби на Северен Лондон, Манчестер Сити киксна и загуби од Њукасл со 2:1. Арсенал ја дочека својата шанса со раширени раце. Тотенхем се надеваше дека може да го сопне лутиот ривал, но наместо тоа, доживеа дебакл. На сцената стапи нестварниот Еберечи Езе, кој го постигна својот прв сениорски хет-трик, донесувајќи му на Арсенал огромни шест бода предност на врвот на табелата.
5. Манчестер Јунајтед му удри шлаканица на Сити на почетокот на 2026 година
По новогодишните празници, Манчестер Сити влезе во незапамтена резултатска криза, а кулминацијата се случи на „Олд Трафорд“. Патрик Доргу ја искористи невнимателноста на Рико Луис и го совлада Џанлуиџи Донарума за победа на Јунајтед во градското дерби.
Тоа беше четврти последователен меч без триумф за Сити во 2026 година (по киксовите со Сандерленд, Челси и Брајтон), што му овозможи на Арсенал да избега на дури седум бода предност.
6. Габриел за влакно избегна црвен картон против Халанд
Во април, на директниот дуел на „Етихад“, Сити славеше со 1:0 со голот на Халанд, но клучниот момент за остатокот од сезоната се случи во финишот. По една жестока битка во текот на целиот меч, Халанд и Габриел влегоа во клинч, „глава во глава“, при што дефанзивецот на Арсенал направи остар и агресивен потег со челото. Тоа што Халанд остана на нозе го спаси Габриел од директен црвен картон. Доколку беше исклучен за насилно однесување, Арсенал ќе мораше да игра три клучни меча без својот најдобар дефанзивец.
7. Кардиналната грешка на Марк Геи на „Гудисон Парк“
Сити со победата против Барнли се искачи на врвот поради подобра гол-разлика, но имаше пеколно гостување кај Евертон. Сè одеше по планот на Гвардиола, Жереми Доку донесе водство, а Сити ја контролираше играта до 68-та минута.
Тогаш, новото засилување Марк Геи направи катастрофално, превртливо враќање на топката наназад, што го искористи Тиерно Бари за израмнување. Евертон постигна три гола за само 13 минути, а иако Сити во судиското продолжение извлече реми (3:3), тие два загубени бода значеа враќање на предноста кај Арсенал.
8. Нестварната одбрана на Раја и спасот од ВАР во финишот
Најтешкиот испит во финишот за Арсенал беше гостувањето кај жилавиот Вест Хем. Мечот беше во тотален егал (0:0), кога Матеус Фернандес излезе сам „очи во очи“ на само шест метри од голот. Тогаш, Давид Раја направи нестварна рефлексна одбрана со десната нога за да го спаси својот тим. Веднаш потоа Тросар погоди за 1:0 во 83-та минута.
Драмата кулминираше во судиското продолжение кога Калум Вилсон погоди со глава по корнер за 1:1, предизвикувајќи шок кај „топчиите“. Сепак, на сцена стапи ВАР собата, која по долго прегледување го поништи голот поради фаул на Пабло, кој со рака го држеше Раја за градите во петерецот. Вест Хем и Сити беа бесни, но Арсенал ги однесе трите бода кои значеа дефинитивно прекинување на две децении долгиот пост!
