Нашата турнеја низ градовите домаќини на Светското првенство 2026 продолжува на југоистокот од Соединетите Американски Држави. Во срцето на Атланта, главниот град на сојузната држава Џорџија, се издигнува ултрамодерна арена која во класичниот и современ градски пејзаж изгледа како да е вонземски матичен брод кој штотуку слетал на Земјата.
Официјално познат како „Мерцедес-Бенц Стадион“ (популарно наречен „The Benz“), овој архитектонски ѕвер со подвижен покрив ќе биде епицентарот на дури осум мундијалски натпревари, вклучувајќи и едно големо полуфинале.
Единствениот преседан на ФИФА: Логото кое не смее да се покрие
За време на Светското првенство, ФИФА има строги правила за бришење на сите корпоративни и спонзорски имиња од стадионите, па така овој објект официјално ќе го носи името „Атланта Стадион“. Но, тука се појави еден масивен, нерешлив проблем.
На самиот врв од импозантниот покрив (кој се состои од осум огромни подвижни панели) се наоѓа џиновско лого на „Мерцедес“. Инженерите утврдиле дека секој обид да се покрие оваа ѕвезда би можел трајно да го оштети комплексниот механизам на покривот. Поради тоа, ФИФА мораше да направи редок преседан и да дозволи логото на германскиот автомобилски гигант козметички да остане видливо за време на целиот турнир.
Милијардерски комплекс и нереалниот потег на Кање Вест
Стадионот беше отворен во 2018 година како замена за стариот „Џорџија Дом“, а неговата изградба чинеше вртоглави 1.6 милијарди долари. Тој е редовен дом на НФЛ тимот Атланта Фалконс, како и на МЛС франшизата Атланта Јунајтед. За да биде искуството уште поспектакуларно, градот моментално инвестира 5 милијарди долари во околниот простор наречен „Centennial Yards“, кој за Мундијалот ќе понуди нови хотели, ресторани и фан-зони.
Спортската историја на стадионот веќе е богата. Во 2019 година тука се одигра Суперболот во кој Том Брејди и Њу Ингланд славеа над ЛА Рамс, а стадионот држи и неколку рекорди по посетеност во МЛС лигата (преку 73.000 гледачи на финалето во 2018 година).
Сепак, најбизарната приказна е врзана за музичката индустрија. Во 2021 година, раперот Кање Вест (сега познат како Је) буквално живееше во соблекувалната на стадионот речиси еден месец! Тој изнајми простор кој го претвори во импровизирано студио за да го доврши својот албум „Donda“, плаќајќи неверојатни 1 милион долари дневно за овој луксуз.
Природна трева, климатизација и најевтина храна во Америка
Вообичаено, стадионот користи модерна вештачка трева, но според правилата на ФИФА, таа ќе биде целосно заменета со врвна природна трева. По критиките на Копа Америка 2024, организаторите ги усовршија технологиите за одржување трева во затворен простор, што се покажа како полн погодок на Светското клупско првенство во 2025.
Летните месеци во овој град се пеколни (домашните мразат кога туристите го користат терминот „Hotlanta“), па токму затоа покривот ќе остане затворен за време на сите натпревари, а навивачите ќе уживаат во моќниот систем за климатизација.
Она што најмногу ќе ги израдува фановите е политиката на цени. Ова е стадионот со најевтина храна и пијалаци во САД, каде повеќето продукти чинат од 2 до 7 долари.
Кои натпревари ќе се играат во Атланта?
Вкупно осум натпревари ќе се одиграат под затворениот покрив, а распоредот ветува големи возбудувања:
- 15 јуни: Шпанија – Зеленортски Острови (Група Х)
- 18 јуни: Чешка – Јужна Африка (Група А)
- 21 јуни: Шпанија – Саудиска Арабија (Група Х)
- 24 јуни: Мароко – Хаити (Група Ц)
- 27 јуни: ДР Конго – Узбекистан (Група К)
- 1 јули: Натпревар од 1/16 финалето
- 7 јули: Натпревар од 1/8 финалето
- 15 јули: Полуфинале
Прочитајте ги и другите досега објавени водичи за мундијалските стадиони:
